omicron : दक्षिण आफ्रिकेत आढळलेल्या ओमिक्रॉन विषणूच्या संसर्गाचा धोका भारतातही वाढला आहे. कर्नाटकातील दोन रुग्णांमध्ये ओमिक्रॉनची लक्षणे आढळली आहेत. त्यानंतर राज्य सरकारने नवीन कोविड मार्गदर्शक तत्त्वे जारी केली. महाराष्ट्रातही 30 जणांचे नमुने तपासणीसाथी पाठवण्यात आले आहेत. अशातच राजस्थानच्या जयपूरमध्ये (Jaipur) एकाच कुटुंबातील 9 लोक पॉझिटिव्ह (Positive) आढळले आहेत, त्यापैकी 4 दक्षिण आफ्रिकेतून परतले असल्याचे बोलले जात आहे.

राजस्थानच्या जयपूरमध्ये एकाच कुटुंबातील 9 जणांना संसर्ग झाल्याचे आढळून आले असून त्यापैकी 4 जण दक्षिण आफ्रिकेतून एक दिवस आधी परतले होते. यामध्ये ओमिक्रॉनची चाचणी झालेली नाही, परंतु त्यांचे नमुने जीनोम सिक्वेन्सिंगसाठी पाठवण्यात आले आहेत. पॉझिटिव्ह आढळलेल्या सर्व 9 लोकांना राजस्थान आरोग्य विज्ञान विद्यापीठात हलवण्यात येणार आहे.

कर्नाटकमधील दोन लोकांमध्ये ओमिक्रॉनची लक्षणे आढळली आहेत. त्यामुळे धोका आणखी वाढला आहे. कर्नाटकचे आरोग्य मंत्री डॉ. के सुधाकर म्हणाले की, दक्षिण आफ्रिकेत ओमिक्रॉनचा धोका वाढीस लागल्यापासून 57 प्रवासी बेंगळुरूला परतले आहेत, त्यापैकी 10 अद्याप बेपत्ता आहेत. या 10 परदेशी प्रवाशांचा शोध लागत नाही तसेच त्यांचे फोनही बंद आहेत.