Presidential Election 2022: राष्ट्रपतीपदाच्या निवडणुकीसाठी NDA उमेदवार द्रौपदी मुर्मू यांनी उमेदवारी अर्ज दाखल केला आहे. मुर्मू यांनी संसद भवनातील राज्यसभेच्या महासचिवांच्या कार्यालयात अर्ज दाखल केला. यावेळी त्यांच्यासोबत पंतप्रधान नरेंद्र मोदी, गृहमंत्री अमित शाह, संरक्षण मंत्री राजनाथ सिंह, भाजप अध्यक्ष जेपी नड्डा आणि भाजपशासित राज्यांचे सर्व मुख्यमंत्री उपस्थित होते. (NDA Presidential candidate Droupadi Murmu)

प्रदीर्घ चर्चेनंतर मुर्मू यांचे नाव समोर आले. राष्ट्रीय अध्यक्ष जेपी नड्डा यांनी सांगितले की, बैठकीत 20 नावांवर चर्चा केल्यानंतर सर्वांनी एकमताने पूर्व भारतातील आदिवासी महिला नेत्या द्रौपदी मुर्मू यांना एनडीएचे अध्यक्षपदाचे उमेदवार बनवण्याचा निर्णय घेतला आहे.

यापूर्वी विरोधी पक्षाने यशवंत सिन्हा यांना संयुक्त उमेदवार म्हणून घोषित केले आहे. यशवंत सिन्हा 27 जून रोजी उमेदवारी अर्ज दाखल करणार असल्याचे सांगण्यात आले आहे. नामांकनाची अंतिम तारीख 29 जून आहे. राष्ट्रपतीपदाची निवडणूक 18 जुलै रोजी होणार असून निकाल 21 जुलै रोजी जाहीर होणार आहेत.

मुर्मू यांचा विजय जवळपास निश्चित

राष्ट्रपतीपदाच्या निवडणुकीत एनडीएच्या उमेदवार द्रौपदी मुर्मू यांचा विजय जवळपास निश्चित झाला आहे. विजयाच्या आकड्यापासून अवघ्या काही पावले दूर असलेली एनडीए आता नवीन पटनायक आणि जगन मोहन रेड्डी यांच्या पाठिंब्याने बहुमताच्या खूप पुढे जात असल्याचे दिसते. दुसरीकडे आकड्याच्या तुलनेत विरोधक खूपच मागे असल्याचे दिसत आहे. याचा सरळ अर्थ असा आहे की द्रौपदी मुर्मू भारताच्या पुढील राष्ट्रपती होऊ शकतात.