Karnataka Mosque Bus Stop: काही दिवसांपूर्वी कर्नाटकातील म्हैसूर येथील बसस्थानकाचे छायाचित्र इंटरनेटवर व्हायरल झाला होता. बसस्थानकावर तीन घुमट बांधण्यात आले होते, जे 'मशिदीसारखे' दिसत होते. त्यानंतर एका, भाजप खासदाराने बसस्थानक पाडण्याची धमकी दिली होती. त्यानंतर या बसस्थानकाचे नवे रूप समोर आले आहे.

भाजप खासदार प्रताप सिम्हा यांनी हे बसस्थानक पडण्याची धमकी दिली होती. "बसस्थानकाला तीन घुमट आहेत, मध्यभागी एक मोठा आणि त्याच्या पुढे दोन लहान घुमट आहेत. ती फक्त एक मशीद आहे. मी अभियंत्यांना तीन-चार दिवसांत हे बांधकाम पाडण्यास सांगितले आहे. त्यांनी पाडले नाही, तर मी जेसीबी घेऊन ते पाडून टाकणार." अशी धमकी त्यांनी दिली होती.

दरम्यान, या बसस्थानकाचे नवे रूप समोर आले आहे. राष्ट्रीय महामार्ग-766 च्या केरळ बॉर्डर-कोलेगला सेक्शनवर असलेल्या या बसस्थानकावर सुरूवातीला तीन घुमट होते, सध्या या बसस्थानकावर फक्त एकच घुमट आहे. तसेच, त्याला लाल रंग देण्यात आला आहे.

स्थानिक भाजप आमदारानेच बांधले होते बसस्थानक

स्थानिक भाजप आमदार राम दास, यांनीच हे बसस्थानक बांधले होते. आमदार राम दास यांनी सर्व टीका आणि विरोधाचे खंडण करत, हे बसस्थानकाची रचना म्हैसूर पॅलेसपासून प्रेरित असल्याचे सांगितले. तसेच, आमदार राम दास यांनी बसस्थानकावरून झालेल्या टीकेनंतर माफी देखील मागितली आहे.