IMD Kerala Monsoon Arrival 2026: भारतीय हवामानशास्त्र विभागाने यंदाच्या नैऋत्य मोसमी पावसाबाबत (मान्सून) अत्यंत महत्त्वाची अपडेट दिली. हवामान विभागाच्या अंदाजानुसार, यंदा मान्सून 4 जूनला केरळमध्ये दाखल होण्याची दाट शक्यता आहे. दरवर्षी मान्सूनच्या आगमनाकडे संपूर्ण देशातील शेतकरी आणि सर्वसामान्य जनतेचे लक्ष लागलेले असते. केरळमधील आगमनानंतर साधारणपणे पुढील काही दिवसांत मान्सून देशाच्या इतर भागात दाखल होतो. त्यामुळे जूनच्या पहिल्या आठवड्यात केरळमध्ये होणारे मान्सूनचे आगमन हा देशातील यंदाच्या पावसाळ्याच्या प्रवासातील एक महत्त्वाचा टप्पा ठरणार आहे.

मान्सून केरळच्या उंबरठ्यावर असतानाच, दुसरीकडे महाराष्ट्रासह गुजरात राज्यातही मान्सूनपूर्व पावसाचा जोर वाढणार असल्याचा इशारा हवामान विभागाने दिला. आयएमडीच्या अंदाजानुसार, 2 जून ते 6 जून दरम्यान कोकण, गोवा (Goa) आणि मध्य महाराष्ट्रात विजांच्या कडकडाटासह आणि वादळी वाऱ्यासह हलका ते मध्यम स्वरुपाचा पाऊस पडण्याची शक्यता आहे. या काळात वाऱ्याचा वेग ताशी 40 ते 50 किलोमीटरपर्यंत राहू शकतो, ज्यामुळे नागरिकांनी आणि विशेषतः मच्छिमारांनी योग्य ती खबरदारी घेण्याचे आवाहन करण्यात आले.

याशिवाय, मराठवाड्यात 2 जून ते 4 जून दरम्यान वादळी वाऱ्यासह पावसाच्या सरी कोसळण्याचा अंदाज आहे, तर शेजारील गुजरात राज्यात 2 जून ते 5 जून या कालावधीत काही ठिकाणी विजांच्या कडकडाटासह पाऊस हजेरी लावू शकतो. एकंदरीत जूनच्या पहिल्या आठवड्यात राज्याच्या विविध भागांत मेघगर्जनेसह मान्सूनपूर्व हालचाली तीव्र होणार आहेत. केरळमध्ये 4 जून रोजी मान्सूनचे आगमन वेळेवर झाल्यास, महाराष्ट्रातही तो वेळेत दाखल होईल, अशी आशा व्यक्त केली जात आहे.

सध्या निर्माण झालेल्या वातावरणामुळे उकाड्यापासून हैराण झालेल्या नागरिकांना काहीसा दिलासा मिळण्याची शक्यता असली, तरी वादळी वाऱ्यामुळे होणारे नुकसान टाळण्यासाठी हवामान विभागाने सतर्कतेचा इशारा दिला आहे.