देशभरात अग्निपथ योजनेला विरोध होत असताना बिहारचे विरोधी पक्षनेते तेजस्वी यादव यांनी शनिवारी राष्ट्रीय राजधानी दिल्लीत पत्रकार परिषद आयोजित केली. पत्रकार परिषदेदरम्यान त्यांनी केंद्राच्या नव्या योजनेचा तीव्र शब्दात निषेध केला. तरुणांवर लक्ष केंद्रित करणाऱ्या या योजनेबाबत त्यांनी केंद्राला 20 प्रश्न विचारले आणि त्यांची उत्तरे देण्याचे आवाहनही केले. (mnrega for educated youth tejashwi yadav furious over agneepath scheme)

यासोबतच त्यांनी भाजप (BJP) नेत्यांना सीमेवर जाण्याचा सल्लाही दिला. पत्रकार परिषदेला संबोधित करताना, त्यांनी प्रश्न केला की, ही सुशिक्षित तरुणांसाठी मनरेगासारखी योजना आहे की त्यामध्ये राष्ट्रीय स्वयंसेवक संघाचा (RSS) काही "गुप्त अजेंडा" आहे.

सरकारने शंका दूर कराव्यात

पत्रकार परिषदेदरम्यान, त्यांनी युवकांना योजनेच्या विरोधात शांततापूर्ण आंदोलन करण्याचे आवाहन केले. या संपूर्ण प्रकरणावर पंतप्रधान नरेंद्र मोदी (Prime Minister Narendra Modi) गप्प का आहेत, असा सवाल त्यांनी यावेळी विचारला. तेजस्वी यांनी पुढे असेही सांगितले की, सरकार 'वन रँक, वन पेन्शन'ची चर्चा करते, परंतु सरकारने अग्निपथ योजनेच्या रुपात "नो रँक, नो पेन्शन" अशी योजना आणली आहे. सरकारला 20 प्रश्न विचारताना तेजस्वी पुढे म्हणाले की, 'लोकांच्या मनात अनेक शंका आहेत, ज्या सरकारने दूर कराव्यात.'

विरोधकांवर आरोप

अग्निपथ योजना सैन्यात भरती होणाऱ्या अधिकाऱ्यांसाठी का नाही, असा सवालही यादव यांनी यावेळी बोलताना उपस्थित केला. ते पुढे म्हणाले, "देशाच्या अनेक भागांमध्ये आंदोलने होत आहेत आणि ज्यांना सैनिक बनायचे आहे ते संतप्त आहेत."