Mamata Banerjee: पश्चिम बंगालच्या बर्दवानमध्ये मुख्यमंत्री ममता बॅनर्जी यांच्या गाडीला अपघात झाला. या अपघातात मुख्यमंत्री ममता बॅनर्जी यांच्या डोक्याला दुखापत झाली आहे. ही दुखापत गंभीर नसल्याचे सांगण्यात येत आहे. मिळालेल्या माहितीनुसार, मुख्यमंत्री ममता यांच्या ताफ्यात अचानक एक कार घुसली. ताफ्यात गाडी अचानक घुसल्याने कार चालकाने अचानक ब्रेक दाबला. त्यामुळे ममता बॅनर्जी यांच्या डोक्याला मार लागला. ही दुखापत किरकोळ असल्याचे सांगण्यात येत आहे.

दाट धुक्यामुळे हा अपघात झाला

यापूर्वी, ममता बॅनर्जी हेलिकॉप्टरने कोलकाता येथे परतणार होत्या, परंतु दाट धुके आणि कमी दृश्यमानता यामुळे त्यांनी रस्त्याने जाण्याचा निर्णय घेतला असल्याचेही वृत्त आहे. दाट धुक्यामुळे ममता बॅनर्जींच्या गाडीला अपघात झाल्याचे सांगण्यात येत आहे. अपघातानंतर ममता बॅनर्जी यांना एसएसकेएम रुग्णालयात दाखल करण्यात आले आहे. त्यांच्या दुखापतीबाबत अद्याप कोणीही माहिती दिलेली नाही.

प्रशासकीय अधिकाऱ्यांच्या बैठकीसाठी ममता वर्धमानला गेल्या होत्या

ममता बॅनर्जी वर्धमान जिल्ह्यात प्रशासकीय अधिकाऱ्यांची बैठक घेण्यासाठी गेल्या होत्या. तेथून परतत असताना हा अपघात झाला. याआधीही जून 2023 मध्ये ममता बॅनर्जी प्रवासादरम्यान जखमी झाल्या होत्या. त्यावेळी, ममता यांच्या हेलिकॉप्टरचे इमर्जन्सी लँडिंग करण्यात आले होते.