Kashmir Biryani Scam: 45 लाखांच्या बिर्याणी घोटाळ्याप्रकरणी FIR दाखल, जाणून घ्या काय आहे प्रकरण?
Kashmir Biryani Scam: लाचलुचपत प्रतिबंधक विभागाने (ACB) जम्मू-काश्मीर फुटबॉल असोसिएशनमधील (Jammu and Kashmir Football Association) घोटाळा उघड केला आहे. जम्मू-काश्मीर स्पोर्ट्स कौन्सिलकडून मिळालेल्या 45 लाख रुपयांचा गैरव्यवहार केल्याप्रकरणी एसीबीने जम्मू आणि काश्मीर फुटबॉल असोसिएशनच्या (JKAF) अधिकाऱ्यांविरुद्ध एफआयआर नोंदवला आहे.
बनावट बिले दाखवून उकळले पैसे
एसीबीच्या अधिकाऱ्यांनी दिलेल्या माहितीनुसार, जेकेएफएचे माजी अध्यक्ष जमीर अहमद ठाकूर, खजिनदार एसएस बंटी, मुख्य कार्यकारी एसए हमीद, जिल्हाध्यक्ष जेकेएफए फयाज अहमद आणि इतरांसह जम्मू आणि काश्मीर फुटबॉल असोसिएशनच्या सदस्यांवर खोटी आणि बनावट बिले तयार करून पैसे उकळल्याप्रकरणी गुन्हा दाखल करण्यात आला आहे.
पोलिसांनी कोणत्या कलमांखाली एफआयआर नोंदवला?
ACB ने JK PC Act 2006 च्या कलम 5(2) आणि 465, 467, 468, 471 च्या कलम 5(1)(c), 5(1)(d) 30/22 नुसार एफआयआर नोंदवला आहे. एसीबीच्या अधिकाऱ्यांनी दिलेल्या माहितीनुसार, सोपोरच्या मुश्ताक अहमद भट यांनी दिलेल्या तक्रारीनंतर ब्युरोने प्राथमिक चौकशी केली होती. जम्मू-काश्मीर स्पोर्ट्स कौन्सिल आणि इतर सरकारी आणि निमसरकारी संस्थांनी दिलेल्या निधीत घोटाळा केल्याचा आरोप तक्रारीत करण्यात आला आहे.
खेलो इंडियासाठी किती पैसे दिले?
स्पोर्ट्स कौन्सिलच्या म्हणण्यानुसार, जम्मू आणि काश्मीरमध्ये फुटबॉल सामन्यांसाठी राज्यभरात खेलो इंडिया आणि मुफ्ती मेमोरियल गोल्ड कपसारख्या स्पर्धा आयोजित करण्यासाठी पैसे देण्यात आले होते. जम्मू-काश्मीर फुटबॉल असोसिएशनच्या सदस्यांनी मुघल दरबार, पोलो व्ह्यू श्रीनगर या रेस्टॉरंटला बिर्याणीसाठी 43,06,500 रुपये दिल्याचे तपासात आढळून आले. मात्र काश्मीरमधील कोणत्याही जिल्ह्यात कोणत्याही टीमला बिर्याणी खायला दिली जात नसल्याचे तपासात समोर आले आहे.
बनावट कागदपत्रांच्या आधारे पैसे काढले
तसेच विविध कामांमध्ये कागदपत्रांच्या फोटो स्टेटसाठी भरलेली बिले बनावट होती. तपासादरम्यान, जम्मू आणि काश्मीर स्पोर्ट्स कौन्सिलने काश्मीर विभागासाठी जारी केलेल्या 50 लाख रुपयांच्या बजेटमधून 43,06,500 रुपये काढण्यात आल्याचेही समोर आले आहे. जे बनावट बिले किंवा कागदपत्रांच्या आधारे तयार करण्यात आले होते.
जनतेच्या पैशांचा गैरवापर
जम्मू-काश्मीर फुटबॉल असोसिएशनचा कार्यक्रम सुरू होण्यापूर्वी जम्मू-काश्मीर क्रीडा परिषदेने या निधीचा वापर केल्याचेही या तपासणीत आढळून आले. या सर्व बिलांवर एकाच व्यक्तीचे हस्ताक्षर असल्याचे तपासात समोर आले आहे. या प्रकरणी अद्याप कोणालाही अटक करण्यात आलेली नसून, या प्रकरणामुळे राज्यातील क्रीडा पायाभूत सुविधांच्या विकासासाठी जनतेच्या पैशांचा गैरवापर केल्याचा प्रकार उघडकीस आला आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.