IT Raid In Odisha and Jharkhand: देशात श्रीमंत व्यक्ती श्रीमंत होत चालले आहे तर, गरीब व्यक्ती अधिकच गरीब... काही लोकांकडे एवढा पैसा आहे की नोटा मोजण्यासाठी मशीनही कमी पडत आहेत. ओडिशा आणि झारखंडमधून असेच एक प्रकरण समोर आले आहे, जिथे आयकर विभागाच्या छाप्यात इतकी रोकड सापडली की मशीनने मोजणेही बंद केले.

दरम्यान, झारखंडमधील काँग्रेसचे राज्यसभा सदस्य धीरज साहू यांच्या घरावर आयकर विभागाने छापा टाकला आहे. ओडिशात त्यांच्या नातेवाईकांच्या नावावर दारुचा व्यवसाय आहे. त्यांच्या नावावर बौद्ध डिस्टिलरीज प्रायव्हेट लिमिटेड नावाची कंपनी आहे. या कंपनीची ओडिशा आणि झारखंडमध्ये अनेक कार्यालये आहेत, जिथे बुधवारी आयकर विभागाने छापेमारी केली, जी गुरुवारीही सुरु आहे. करचुकवेगिरीच्या आरोपावरुन ही कारवाई करण्यात आली आहे. आयकर विभागाच्या पथकाद्वारा सुरु असलेल्या शोधात नोटांचे इतके बंडल सापडले आहेत की मोजण्याचे मशीनही बंद पडले. आतापर्यंत आयकर विभागाला 50 कोटींहून अधिक रक्कम मिळाली आहे.

आयकर सूत्रांनी दिलेल्या माहितीनुसार, ओडिशातील बोलंगीर, संबलपूर आणि झारखंडमधील रांची, लोहरदगा इथे आयकर विभागाचे सर्च ऑपरेशन सुरु आहे. यावेळी आयकर विभागाच्या पथकाने कंपनीच्या कार्यालयातून मोठ्या प्रमाणात रोकड जप्त केली. नोटांचे इतके बंडल आहेत की, मशिननेही काम करणे बंद केले. या संदर्भात एएनआय या वृत्तसंस्थेने नोटांच्या बंडलचे काही फोटो प्रसिद्ध केले आहेत. या फोटोंमध्ये कपाटात मोठ्या प्रमाणात रोकड दिसत आहे.