Cheetah Helicopter Crash: अरूणाचल प्रदेशातील तवांग परिसरात भारतीय सैन्य दलाचे चिता हे हेलिकॉप्टर कोसळून एका पायलटचा मृत्यू झाला आहे. लेफ्टनंट कर्नल सौरभ यादव असे त्यांचे नाव आहे. सकाळी 10 च्या सुमारास ही दुर्घटना घडली आहे.

नियमित निरिक्षणासाठी या हेलिकॉप्टरने उड्डाण केले होते. हेलिकॉप्टर कोसळल्यानंतर दोन्ही पायलट्सना तातडीने जवळच्या सैन्य रुग्णालयात दाखल केले गेले. पण एका पायलटचा उपचार सुरू असताना मृत्यू झाला. दुसऱ्यावर सध्या उपचार सुरू आहेत. अपघाताची कारणे अद्याप स्पष्ट झालेली नाहीत.

अपघाताच्या कारणांचा शोध घेण्यासाठी चौकशीचे आदेश देण्यात आले आहेत. चिता या प्रकारातील हेलिकॉप्टर साठ वर्षांपासून भारतीय हवाई दलाच्या सेवेत आहेत. अनेकवेळा ही हेलिकॉप्टर रिप्लेस करण्याचे प्रयत्न झाले, पण त्यात यश आले नव्हते.

या वर्षी मार्चमध्येही जम्मू आणि काश्मिरमध्ये एलओसीजवळ चिता हेलिकॉप्टर क्रॅश झाले होते. तसेच गतवर्षी सीडीएस बिपिन रावत यांचेही हेलिकॉप्टर तामिळनाडूत क्रॅश झाले होते. ते एमआय-17 व्ही 5 या हेलिकॉप्टरमधून प्रवास करत होते. त्यता त्यांच्यासह त्यांची पत्नी आणि आणखी 12 अधिकाऱ्यांचा मृत्यू झाला होता.