Agni-1 Ballistic Missile: भारताने गुरुवारी (1 जून) ओडिशातील एपीजे अब्दुल कलाम बेटावरुन मध्यम पल्ल्याचे बॅलिस्टिक क्षेपणास्त्र अग्नी-1 ची यशस्वी चाचणी केली.

संरक्षण मंत्रालयाचे प्रवक्ते भारत भूषण यांनी माहिती दिली की, हे क्षेपणास्त्र अत्यंत अचूकतेने लक्ष्यावर मारा करण्यास सक्षम आहे.

ते पुढे म्हणाले की, प्रक्षेपणात क्षेपणास्त्राच्या सर्व ऑपरेशनल आणि तांत्रिक बाबींची यशस्वीपणे पडताळणी करण्यात आली.

दरम्यान, भारत गेल्या दोन दशकांपासून विविध बॅलेस्टिक क्षेपणास्त्रे, अचूक-मार्गदर्शित युद्धसामग्री आणि संबंधित 'प्लॅटफॉर्म' विकसित करुन आपली सामरिक क्षमता वाढवण्यावर भर देत आहे. भारताने (India) 'अग्नी' मालिकेतील क्षेपणास्त्रांचे विविध प्रकार विकसित केले आहेत.

गेल्या डिसेंबरमध्ये भारताने अग्नी-5 या आण्विक-सक्षम बॅलिस्टिक क्षेपणास्त्राची यशस्वी चाचणी घेतली, जी 5,000 किमी अंतरापर्यंतच्या लक्ष्यांवर अचूक मारा करु शकते.

अग्नी 1 ते 4 क्षेपणास्त्रांचा पल्ला 700 किमी ते 3,500 किमी आहे. विशेष म्हणजे, ते आधीच तैनात करण्यात आले आहे.

याआधी, भारताने 10 जानेवारी 2023 रोजी पृथ्वी-2 या कमी पल्ल्याच्या बॅलेस्टिक क्षेपणास्त्राचे (Missile) यशस्वी परीक्षण केले होते. हे प्रक्षेपण ओडिशाच्या चांदीपूर येथील एकात्मिक चाचणी श्रेणीतून करण्यात आले.

पृथ्वी-2 क्षेपणास्त्र ही एक अत्यंत कार्यक्षम यंत्रणा आहे. या प्रशिक्षण प्रक्षेपणाद्वारे क्षेपणास्त्राचे सर्व ऑपरेशनल आणि तांत्रिक मापदंड यशस्वीरित्या सत्यापित करण्यात आले.