जम्मू-काश्मीरमधील श्रीनगरमधील सौरा भागात मंगळवारी दहशतवाद्यांनी एका पोलिस कॉन्स्टेबलची गोळ्या झाडून हत्या केली. अधिकाऱ्यांनी ही माहिती दिली. त्यांनी सांगितले की, दहशतवाद्यांनी हवालदार सैफुल्लाह कादरी यांच्या सौरा भागात असलेल्या घरावर गोळीबार केला. अधिकाऱ्यांनी सांगितले की, कादरी यांना SKIMS रुग्णालयात नेण्यात आले, मात्र तिथे त्यांचा मृत्यू झाला. या हल्ल्यात पोलिस कर्मचाऱ्याची 7 वर्षांची मुलगीही जखमी झाली आहे.

पोलिसांनी दिलेल्या माहितीनुसार, मध्य काश्मीरमधील सौरा भागातील हा पोलिस कर्मचारी आपल्या मुलीसह बाजारातून जात असताना अचानक दहशतवाद्यांनी त्यांच्यावर हल्ला केला. या हल्ल्यात एक पोलीस कर्मचारी आणि त्यांची मुलगी गंभीर जखमी झाले. या हल्ल्यानंतर दहशतवादी तिथून पळून जाण्यात यशस्वी झाले. दहशतवाद्यांना (Terrorists) पकडण्यासाठी पोलीस आणि सुरक्षा दलांनी शोध मोहीम सुरु केली आहे.

दुसरीकडे, दहशतवादी हल्ल्यानंतर संपूर्ण भागाची नाकेबंदी करण्यात आली आहे. जवळपासच्या सर्व नाक्यांना सतर्कतेचा इशारा देण्यात आला आहे. परिसरात बसवण्यात आलेल्या सीसीटीव्हीच्या माध्यमातूनही तपास करुन दहशतवाद्यांची ओळख पटवण्याचे काम सुरु आहे. सोमवारी, जम्मू आणि काश्मीर पोलिसांनी (Police) सांगितले की, आम्ही लष्कर-ए-तैयबाच्या (Lashkar-e-Taiba) पाच अतिरेक्यांना अटक केली होती, त्यापैकी तीन जण गेल्या महिन्यात बारामुल्ला येथील सरपंचाच्या हत्येमध्ये सहभागी होते.