Hyderabad To Goa Travel Experience

लांबचा प्रवास म्हटलं की काही ना काही अनपेक्षित घटना घडत असतात, अर्थात प्रत्येकवेळीच असं होईल असं नाही पण, अनेकदा काही विचित्र अनुभव येतात. मियापूर, हैद्राबाद येथून गोव्यात येणाऱ्या 25 प्रवाशांना विविध समस्यांचा सामना करावा लागला.

महत्वाची बाब म्हणजे यात काही जण मुलाखत देण्यासाठी तर काहीजण महत्वाच्या कामानिमित्त गोव्यात येत होते.

झालं असं की मियापूर, हैद्राबाद येथून 25 प्रवासी खासगी बसद्वारे गोव्यात येत होते. प्रवाशांना घेण्यासाठी बस ठरलेल्या गंतव्य स्थानवर येणे अपेक्षित होते पण, प्रवशांना स्वखर्चाने दुसऱ्या पिकअप पॉईंटपर्यंत जावे लागले.

प्रवासी बसमध्ये बसले खरे पण बसमध्ये एसी आणि इतर सुविधा नसल्याने प्रवाशांनी चालकाकडे याबाबत तक्रार केली. पण, रागावलेल्या चालकाने चक्क रस्त्याकडेला गाडी थांबवून पुढे न जाण्याची भूमिका घेतली आणि तो प्रवाशांसोबत हुज्जत घालू लागला.

यातील एका प्रवाशाने 100 नंबरला फोन करुन घडलेल्या प्रकाराची माहिती दिली. पोलिसांनी चालकाला पोलिस स्थानकात नेले खरे पण, तो तिथून फरार झाला.

प्रवाशांना मात्र तिथेच ताटकळत थांबावे लागले, अखेर संतापलेल्या प्रवाशांनी प्रवासी कंपनीविरोधात तक्रार दाखल केली. बसमधील एक प्रवासी चरण वर्मा गोवा तटरक्षक दलासाठी मुलाखत देण्यासाठी निघाला होता. अखेर त्याला तातडीने फ्लाईट बुक करावी लागली आणि त्याने गोवा गाठले.

यातील काही प्रवासी इतर महत्वाच्या कामांसाठी गोव्यात येत होते. मात्र, चालकाच्या आडमुठ्या वागण्याचा त्यांना फटका बसला. मियापूर ते गोवा या प्रवासासाठी प्रत्येक प्रवाशाने दोन हजार रुपये तिकीटासाठी दिले होते. दरम्यान, फसवणूक प्रकरणात कंपनीविरोधात सक्त कारवाई करावी, अशी मागणी सर्व प्रवाशांनी केलीय.