देशात सध्या अनेक ठिकाणी मुसळधार पावसामुळे गंभीर परिस्थिती निर्माण झाली आहे. महाराष्ट्रात अतिवृष्टीमुळे दरड कोसळल्याने कित्येक नागरिकांना आपला जीव गमवावा लागला आहे. अशातच आता हिमाचल प्रदेश मध्ये सुद्धा मोठी दरड कोसळल्याची (Himachal Pradesh Land Slide) घटना घडली आहे. हिमाचल प्रदेशच्या किनौर जिल्ह्यातील ही घटना असुन या घटनेचा व्हिडीओ समोर आला आहे. या व्हिडीओमध्ये डोंगराचा एक मोठा भाग ढासळून खाली येत असल्याचे धडकी भरवणारे दृश्य पहायला मिळते आहे.

ही घटना सांगला-चित्रकुल रोडवरील बटसेरीजवळ घडली. पिंपरी चिटकुळा ते सांगलाकडे जाणाऱ्या एका टेम्पोवर दगड कोसळले. या वाहनात गाडीत चालकासह 11 जण होते. या घटनेत रस्त्यावर असलेला अजुन एक व्यक्तीही जखमी झाला आहे.

या घटनेच्या व्हिडीओमध्ये सांगली खोऱ्यात दगड कोसळल्याचे आणि बाथसेरी पूल उद्ध्वस्त झाल्याचे दिसून आले आहे. त्याचबरोबर घरं आणि झाडांचे सुद्धा मोठे नुकसान झाले आहे. दरम्यान या घटनेत 9 लोकांचा मृत्यू देखील झाला असल्याची प्राथमिक माहिती मिळाली आहे. तर किन्नौर पोलिस घटनास्थळी दाखल झाले असून बचावकार्य सुरू झाले आहे.