उत्तराखंड: उत्तराखंडातील रुद्रप्रयाग येथे रविवारी सकाळी एका खासगी हेलिकॉप्टरच्या दुर्घटनेत किमान सात जणांचा मृत्यू झाला आहे. आर्यन एव्हिएशन प्रायव्हेट लिमिटेड या कंपनीचे हे हेलिकॉप्टर केदारघाटीतील गौरीकुंड व त्रिजुगी नारायण यामधील जंगलात कोसळून आगीच्या भक्षस्थानी गेले.

उत्तराखंड सिव्हिल एव्हिएशन डेव्हलपमेंट प्राधिकरणानुसार (UCADA), हे हेलिकॉप्टर केदारनाथहून सकाळी सुमारे ५.३० वाजता रवाना झाले होते. मात्र, उड्डाण केल्यानंतर काही वेळातच त्याचा अपघात झाला. खराब हवामानामुळे दुर्घटना घडली असावी, असे जिल्हा आपत्ती व्यवस्थापन अधिकारी नंदनसिंग रजवार यांनी सांगितले. गढवाल रेंजचे पोलीस महानिरीक्षक राजीव स्वरूप यांनी या दुर्घटनेबाबत दुजोरा दिला आहे

मुख्यमंत्री पुष्कर सिंह धामी यांनी या सोशल मीडिया 'एक्स'वर या अपघाताबाबत दुःख व्यक्त केले. ते म्हणाले, "रुद्रप्रयाग जिल्ह्यातील हेलिकॉप्टर अपघाताबाबत अत्यंत दुःखद बातमी मिळाली आहे. SDRF, स्थानिक प्रशासन व इतर बचाव पथके मदत व बचाव कार्यात व्यस्त आहेत. सर्व प्रवाशांचे जीवन सुरक्षित राहावे, अशी मी बाबा केदारचरणी प्रार्थना करतो."

याआधी ८ मे रोजी उत्तरकाशी जिल्ह्यात गंगोत्रीधामकडे जाणारे हेलिकॉप्टर कोसळले होते, ज्यामध्ये सहा जणांचा मृत्यू झाला होता. तर, ७ जून रोजी केदारनाथकडे निघालेले दुसरे एक हेलिकॉप्टर तांत्रिक बिघाडामुळे रस्त्यावर आपत्कालीन लँडिंग करण्यास भाग पडले होते. त्या वेळी वैमानिक जखमी झाला होता, पण सर्व पाच यात्रेकरूंना सुखरूप बाहेर काढण्यात आले होते.

या अपघातांची गंभीर दखल घेत मुख्यमंत्री धामी यांनी उत्तराखंडातील हेलिकॉप्टर सेवा संचालनासाठी कठोर दिशा-निर्देश जारी केले आहेत. त्यांनी सांगितले की, प्रत्येक हेलिकॉप्टर उड्डाणाआधी विमानाची सखोल तांत्रिक तपासणी आणि अचूक हवामान माहिती मिळवणे बंधनकारक असेल, अशा स्वरूपातील एक सखोल 'स्टँडर्ड ऑपरेटिंग प्रोसीजर' (SOP) तयार करण्यात यावी.