मुंबई: अमेरिका व इराणच्या युद्धामुळे सोन्या-चांदीचे भाव रविवारी (ता. १) वाढले होते. मात्र, सोमवारी (ता. २) सोन्याच्या भावात दोन हजार ७०० रुपयांची घट झाली, तर चांदीचे भाव मात्र ‘जैसे थे’च होते. मात्र आजही सोन्याच्या भावात ५८०० रूपयांची, तर चांदीत २४ हजारांची घसरण झाली आहे. युद्धामुळे आंतरराष्ट्रीय बाजारात खेळते भांडवल नसल्यानेच ही घसरण झाल्याचे तज्ज्ञांचे म्हणणे आहे.

सोमवारी (ता.२) सोन्याच्या भावात दोन हजार ७०० रुपयांची घसरण झाली. त्यामुळे सोने एक लाख ६७ हजार ८०० (प्रतिदहा ग्रॅम) विनाजीएसटी पोहोचले होते. आज (ता.४) सोन्याच्या भावात पुन्हा ५८०० रुपयांची घसरण झाली. आज विनाजीएसटी एक लाख ६२ हजार असा भाव होता.

शनिवारी (ता.२८) चांदी दोन लाख ९० हजार प्रतिकिलो होती. त्यात रविवारी (ता.१) पाच हजारांची वाढ झाली. चांदीचा भाव दोन लाख ९५ हजार प्रतिकिलो होता. बुधवारी मात्र चांदीच्या भावात २४ हजारांची एकदम घसरण होऊन भाव विनाजीएसटी दोन लाख ७१ हजार रुपये (प्रती किलो) पोचला आहे.

रुपया नीचांकी पातळीवर

अमेरिका-इराण संकटाच्या पार्श्वभूमीवर, कच्च्या तेलाच्या किमतीत वाढ झाल्यामुळे बुधवारी भारतीय रुपया ६७ पैशांनी घसरून ९२.१६ या सार्वकालिक नीचांकी पातळीवर बंद झाला. त्याशिवाय, देशांतर्गत शेअर बाजारात देशी आणि परदेशी गुंतवणूकदारांनीही विक्री केल्याने रुपया आणखी घसरल्याचे परकी चलन व्यापाऱ्यांनी सांगितले.