पुद्दुचेरी: फ्रान्समध्ये होतं असलेल्या राष्ट्रपतीपदाच्या निवडणुकीसाठी (France nationals residing) आज फ्रेंच नागरिकांनी भारतात मतदान केले. ऐकायला थोडं विचित्र वाटेल पण ते खरं आहे. पुद्दुचेरी (Puducherry) या केंद्रशासित प्रदेशात राहणाऱ्या फ्रान्सच्या नागरिकांनी रविवारी त्यांच्या देशाच्या राष्ट्रपतीपदासाठीच्या निवडणुकीत मतदान केले. मिळालेल्या माहितीनुसार फ्रेंच राष्ट्रपती निवडणुकीच्या पहिल्या टप्प्यासाठी केरळ, तामिळनाडू आणि पुद्दुचेरी येथील 4,564 फ्रेंच नागरिकांनी मतदान केले.

आता भारतात राहुन हे कसे शक्य? तर याला कारण म्हणजे, पुद्दुचेरी ही पूर्वी फ्रेंच वसाहत होती. एका प्रकाशनानुसार, "फ्रान्स आपल्या 18 वर्षांपेक्षा जास्त वयाच्या आणि मतदार यादीत नोंदणी केलेल्या नागरिकांना ते राहत असलेल्या देशात मतदान करण्याचा अधिकार देतो." त्यानुसार पुद्दुचेरी प्रदेशातील फ्रान्सच्या महावाणिज्य दूतावासाच्या आवारात दोन आणि कराईकल आणि चेन्नई येथे प्रत्येकी एक मतदान केंद्रं स्थापन करण्यात आली होती. एका 20 वर्षीय मतदाराने पीटीआयला सांगितले की ती पुद्दुचेरी विद्यापीठाशी संलग्न असलेल्या महाविद्यालयात शिकत आहे आणि पहिल्यांदाच तिचा मताधिकार वापरत आहे.

फ्रान्समध्ये राष्ट्रपती निवडणुकीच्या पहिल्या टप्प्यासाठी रविवारी मतदानाला सुरुवात झाली. सकाळी 8 वाजता सुरू झालेले मतदान सायंकाळी 7 वाजेपर्यंत चालल्याचे सूत्रांनी सांगितले. या निवडणुकीत 12 उमेदवार रिंगणात आहेत. पहिल्या टप्प्यात कोणत्याही उमेदवाराला पूर्ण बहुमत मिळाले नाही, तर 24 एप्रिल रोजी आघाडीच्या दोन उमेदवारांमध्ये निवडणूक होणार आहे. या निवडणुकीत सुमारे 4.8 कोटी लोकसंख्या या सर्वोच्च पदासाठी 12 उमेदवारांपैकी एकाची निवड करेल. विद्यमान अध्यक्ष इमॅन्युएल मॅक्रॉन दुसर्‍या टर्मसाठी निवडणूक लढवत आहेत आणि त्यांच्यासमोर मारिन ले पेन यांचे कठीण आव्हान आहे.