Rahul Dravid On Rohit Sharma: भारतीय संघाचा माजी मुख्य प्रशिक्षक राहुल द्रविडने संघाचा माजी कर्णधार रोहित शर्मा याच्या नेतृत्वाचे तोंडभरुन कौतुक केले. टी20 वर्ल्ड कप 2024 च्या विजयानंतर द्रविडने प्रशिक्षकपदाचा राजीनामा दिला. आता नुकत्याच एका मुलाखतीत त्याने रोहितसोबत काम करण्याचा अनुभव सांगितला. रोहित शर्मा एक असा लीडर आहे, जो केवळ आपल्यासाठी नाही तर संघासाठी जगतो, असे गौरवपूर्ण उद्गार द्रविडने काढले.

‘रोहितची दृष्टी पहिल्या दिवसापासूनच स्पष्ट होती’

राहुल द्रविडने (Rahul Dravid) माजी भारतीय खेळाडू रविचंद्रन अश्विनच्या ‘कुट्टी स्टोरीज’ या यूट्यूब चॅनेलवर मुलाखत दिली. यावेळी बोलताना तो म्हणाला की, रोहित शर्मा हा एक असा लीडर आहे, जो संघासाठी जगतो. तो पहिल्या दिवसापासूनच स्पष्ट होता. त्याला संघाला कोणत्या दिशेने घेऊन जायचे आहे, याची पूर्ण कल्पना होती. त्याच्या या स्पष्टतेमुळे माझ्यासाठी त्याच्यासोबत जुळवून घेणे सोपे झाले. संघाच्या ड्रेसिंग रुममधील वातावरण सकारात्मक ठेवण्यावर रोहितने नेहमीच भर दिला, असंही द्रविड म्हणाला. ‘माझ्या मते संघाची वाटचाल कर्णधाराच्या दृष्टिकोनानुसारच व्हायला हवी आणि प्रशिक्षकाचे काम त्याला केवळ पाठिंबा देण्याचे आहे,’ असे मतही द्रविडने यावेळी व्यक्त केले.

अनुभव ही रोहितची सर्वात मोठी ताकद

या संवादात राहुल द्रविडने रोहित शर्माच्या (Rohit Sharma) अनुभवाचे विशेष कौतुक केले. तो म्हणाला, ‘रोहितला खूप मोठा अनुभव आहे आणि हीच त्याची सर्वात मोठी ताकद आहे. त्यामुळे तो कठीण परिस्थितीत किंवा मोठ्या स्पर्धांमध्ये स्वतःला शांत ठेवण्यात यशस्वी होतो.’ रोहितने संघात असे वातावरण तयार केले होते, जिथे खेळाडू कोणत्याही दबावाशिवाय मुक्तपणे खेळू शकतील, असा त्याचा प्रयत्न होता. ‘खेळाडूंनी बिनधास्त खेळावे’ ही त्याची साधी पण प्रभावी विचारसरणी होती, ज्यामुळे संघाने मोक्याच्या क्षणी उत्तम कामगिरी केली.

द्रविडने 2021 च्या शेवटी भारतीय संघाच्या मुख्य प्रशिक्षकपदाची सूत्रे हाती घेतली होती. त्यानंतर त्याच्या आणि रोहितच्या नेतृत्वाखालील संघाने अनेक चढउतार पाहिले. यामध्ये आशिया कप, टी20 वर्ल्ड कप 2022 आणि 2023 वनडे वर्ल्ड कपमधील अपयशाचा समावेश आहे. पण तरीही दोघांनी एकजुटीने काम केले आणि अखेर 2024 मध्ये झालेल्या टी20 वर्ल्ड कप स्पर्धेत भारताला तब्बल 17 वर्षांनंतर वर्ल्ड कप जिंकून दिला. हा विजय या दोघांच्याही मेहनतीचा आणि दूरदृष्टीचा परिणाम मानला जातो. याच विजयानंतर रोहित शर्माने आंतरराष्ट्रीय टी20 क्रिकेटमधून निवृत्ती जाहीर केली.

द्रविडच्या या प्रतिक्रियांमुळे प्रशिक्षक आणि कर्णधाराच्या नात्यातील विश्वास आणि सामंजस्य स्पष्टपणे दिसून येते. रोहित शर्माला मिळालेले हे कौतुक त्याच्या नेतृत्वाची खरी ओळख करुन देते.