लडाखमध्ये (Ladakh) मंगळवारी पहाटे 4.50 च्या सुमारास भूकंपाचे (Earthquake) धक्के जाणवले. नॅशनल सेंटर फॉर सिस्मॉलॉजी (NCS) नुसार, लेहच्या पूर्वेकडील भागात या भूकंपाची तीव्रता रिश्टर स्केलवर 3.7 इतकी मोजली गेली. त्याचवेळी भूकंपाची खोली 10 किमी होती. भूकंपाच्या धक्क्यांमुळे कोणतीही हानी झाल्याचे वृत्त नाही. गेल्या महिन्यात, 24 ऑक्टोबर रोजी कारगिलजवळ भूकंप झाला होता आणि त्याची तीव्रता रिश्टर स्केलवर 4.2 मोजण्यात आली होती.

तमिळनाडूच्या (Tamil Nadu) उत्तरेकडील वेल्लोर शहरापासून काही अंतरावर सोमवारी भूकंप झाला होता. भूकंपाची तीव्रता रिश्टर स्केलवर 3.6 इतकी मोजली गेली. वेल्लोर जिल्हा प्रशासनाच्या अधिकार्‍यांनी सांगितले की, थट्टापराई गाव (गुडियाट्टम तालुका) अंतर्गत मथुरा मिनुर कोल्लीमेडूला भूकंपाचा धक्का बसला आणि भूकंपाच्या प्रभावामुळे परिसरातील एका घराचे नुकसान झाले. दोन मजली घराचे मालक जी सेल्वम यांनी सांगितले की, भूकंपामुळे घरात 'तडा' पडला होता.

गेल्या शुक्रवारी आसाम आणि मिझोरामसह ईशान्य प्रदेशात 6.1 रिश्टर स्केल तीव्रतेचा भूकंप झाला. नॅशनल सेंटर फॉर सिस्मॉलॉजीने शेअर केलेल्या माहितीनुसार, भूकंपाचा केंद्रबिंदू मिझोरामच्या म्यानमार सीमेजवळ होता. हा भूकंप सायंकाळी 5.15 वाजता झाला आणि त्याची खोली जमिनीच्या खाली 35 किमी होती.

आसाम, मिझोराम, मणिपूर आणि त्रिपुरामध्ये अनेक ठिकाणी भूकंपाचे धक्के जाणवले. पश्चिम बंगालमधील कोलकाता, अलीपुरद्वार, दार्जिलिंग आणि जलपाईगुडी जिल्ह्यातही भूकंपाचे धक्के जाणवले, असे अधिकाऱ्यांनी सांगितले.