Droupadi Murmu Operation: राष्ट्रपती द्रौपदी मुर्मू यांच्यावर रविवारी 16 ऑक्टोबर रोजी मोदीबिंदूची शस्त्रक्रिया करण्यात आली. ही शस्त्रक्रिया यशस्वी ठरल्याचे डॉक्टरांनी सांगितले. राष्ट्रपती मुर्मू यांना रूग्णालयातून डिस्चार्जही देण्यात आला आहे. मात्र डॉक्टरांनी त्यांना आऱाम करण्यास सांगितले आहे.

राष्ट्रपती भवन आणि सैन्याच्या रूग्णालयाने दिलेल्या माहितीनुसार, भारतीय लष्कराच्या रिसर्च अँड रेफरल हॉस्पिटलमध्ये ही शस्त्रक्रिया करण्यात आली. राष्ट्रपती भवनातील प्रवक्त्यांनी ही माहिती दिली आहे. मुर्मू यांच्या डाव्या बाजूच्या डोळ्यात मोतीबिंदू झाला होता. ब्रिगेडियर एस. के. मिश्रा आणि त्यांच्या पथकाने ही सर्जरी केली. राष्ट्रपतींना १ वाजून ३० मिनिटांनी रूग्णालयातून डिस्चार्ज देण्यात आला.

दरम्यान, ज्या डॉक्टर ब्रिगेडियर संजय कुमार मिश्रा यांनी मुर्मू यांच्यावर शस्त्रक्रिया केली त्यांनीच गतवर्षी कोव्हिडकाळात तत्कालीन राष्ट्रपती रामनाथ कोविंद आणि त्यांच्या पत्नी सविता कोविंद यांच्यावरही मोतीबिंदू शस्त्रक्रिया केली होती.

या शस्त्रक्रियेपुर्वी राष्ट्रपती मुर्मू यांनी दोन दिवसांचा आसाम दौरा केला होता. शुक्रवारी त्यांनी आसामच्या सुप्रसिद्ध कामाख्या मंदिरात पुजा केली होती. त्यांनी कन्या इतिश्रीसमवेत मंदिराची परिक्रमाही केली. यावेळी त्यांच्यासोबत आसामचे राज्यपाल जगदीश मुखी आणि मुख्यमंत्री हिमांता बिस्वा सरमा देखील उपस्थित होते. दरम्यान, 64 वर्षीय मुर्मू यांनी 25 जुलै रोजी भारताच्या 15 व्या राष्ट्रपती म्हणून शपथ घेतली होती.