Delhi High Court reprimanded A person who seeks divorce because his wife does not have physical relations:

विवाहित जोडप्यांमधील चिडचिड, किरकोळ बाचाबाची, विश्वासाचा अभाव आणि शारीरिक संबंध ठेवण्यास पत्नीचा नकार याला मानसिक क्रूरता समजू शकत नाही, असे दिल्ली उच्च न्यायालयाने घटस्फोटाच्या खटल्याची सुनावणी करताना सांगितले.

पत्नीविरुद्ध पतीच्या याचिकेवर घटस्फोट मंजूर करणारा कनिष्ठ न्यायालयाचा आदेश रद्द करताना उच्च न्यायालयाने सोमवारी ही टिप्पणी केली.

पतीने मानसिक क्रूरतेच्या कारणावरून घटस्फोट मागितला होता. पतीने पत्नीला सासरी राहण्यास स्वारस्य नसल्याचा आरोप केला होता.

पतीने तिच्या माहेरच्या घरी 'घर जावई' म्हणून राहावे अशी तिची इच्छा आहे. तसेच ती शारीरिक संबंध ठेवण्यासही सतत नकार देते असे आरोप पतीने केले होते.

या दोघांनी 1996 मध्ये हिंदू रितीरिवाजांनुसार लग्न केले होते आणि 1998 मध्ये या दोघांना एक मुलगी झाली होती.

पतीने असा दावा केला होता की, त्याची पत्नी काहीतरी बहाणा करत त्याला एकटे सोडत असे आणि तिला फक्त तिचे कोचिंग सेंटर चालविण्यात रस होता.

पतीने असाही आरोप केला होता की, त्‍याची पत्‍नी त्‍याला शरीरसंबंध ठेवण्‍यास सतत नकार द्यायची.

उच्च न्यायालयाने म्हटले आहे की, असे आरोप केवळ अस्पष्ट विधानांच्या आधारे सिद्ध केले जाऊ शकत नाहीत, विशेषत: जेव्हा विवाह विधिवत सोहळ्याद्वारे झाला होता.

खंडपीठाने असे निरीक्षण नोंदवले की, पती त्याच्या विरोधात झालेली मानसिक क्रूरता सिद्ध करण्यात अयशस्वी ठरला आहे आणि सध्याचे प्रकरण हे केवळ वैवाहिक बंधनातील सामान्य मतभेदाचे प्रकरण आहे.

खंडपीठाने म्हटले की, "पत्नीचे आचरण असे कोणतेही सकारात्मक संकेत नाहीत की, तिच्या पतीला तिच्यासोबत राहणे शक्य नव्हते. त्यामुळे किरकोळ चिडचिड आणि विश्वासाचा अभाव याला मानसिक क्रूरता म्हणता येत नाही"

न्यायालयाने असेही म्हटले आहे की, "पती-पत्नीमध्ये विश्वास आणि आपुलकीचा अभाव होता पण असे असूनही ते दोघेही कुटुंबाला वाचवण्यासाठी मेहनत घेत होते. केवळ पत्नीने तिच्या पतीप्रमाणेच तक्रारीच्या निवारणासाठी न्यायालयात धाव घेतल्याने, हे क्रौर्याला प्रोत्साहन देण्यासारखे नाही."