Kedarnath Yatra 2023: चारधाम यात्रा करणे हे देखील भारतीय संस्कृतीत पवित्र मानले जाते. चारधामपैकी एक असलेले केदारनाथ येथील यात्रेला आजपासून सुरुवात झाली आहे. आज सकाळी 6:20 वाजता भाविकांसाठी केदारनाथचे कवाडं उघडण्यात आले.

आज सकाळी गोठवण्याऱ्या थंडीत तब्बल सात हजार भाविकांनी मंदिराला भेट दिली. फुलांची आकर्षक सजावट करण्यासाठी 20 क्विंटल फुलांचा वापर करण्यात आला आहे.

केदारघाटी हर-हर महादेव आणि जय भोलेनाथच्या जयघोषाने संपूर्ण परिसर दुमदुमून गेला आहे. मंदिराचे मुख्य द्वार उघडून केदारनाथचे रावल भीमाशंकर लिंग आणि मुख्य पुजारी यांनी शिवलिंग मंदिरात प्रवेश केला.

सकाळी परंपरागत पूजा करुन येथील दरवाजे उघडण्यात आले. शनिवारी चारधाम यात्रेला सुरुवात झाली.

22 एप्रिलला गंगोत्री आणि यमुनोत्री धामचा दरवाजा उघडण्यात आले. आज केदारनाथ आणि 27 एप्रिलला बद्रिनाथ धामचा दरवाजा उघडणार आहे.

तत्पूर्वी, केदारनाथ रावल यांनी मंदिराच्या प्रवेशद्वारावरून सर्व यात्रेकरू आणि भाविकांना केदारनाथ धामचे महत्त्व, केदारनाथ धामची 6 महिने पूजा करण्याचे महत्त्व याविषयी माहिती दिली.

दरवाजे उघडण्याच्या निमित्ताने मोठ्या संख्येने भाविकांनी बाबा केदार यांचे दर्शन घेतले.