Delhi Deputy Chief Minister Manish Sisodia: दिल्लीचे उपमुख्यमंत्री मनीष सिसोदिया यांना उद्या सीबीआयने चौकशीसाठी बोलावले आहे. खुद्द मनीष सिसोदिया यांनी ट्विट करुन ही माहिती दिली आहे. सीबीआयने उद्या पुन्हा बोलावले आहे, असे ट्विट त्यांनी केले.

तपासात मी नेहमीच सहकार्य केले - सिसोदिया

सिसोदिया यांनी आपल्या ट्विटमध्ये लिहिले की, 'त्यांनी सीबीआय (CBI) आणि ईडीची संपूर्ण शक्ती वापरली आहे, परंतु माझ्याविरुद्ध त्यांना काहीही मिळाले नाही. माझ्या घरावर छापा टाकण्यात आला, बँकेच्या लॉकर्सची झडती घेण्यात आली पण माझ्याविरुद्ध कुठेही काहीही मिळाले नाही. मी दिल्लीतील मुलांसाठी चांगल्या शिक्षणाची व्यवस्था केली आहे. तपासाला मी नेहमीच सहकार्य केले आहे आणि यापुढेही करत राहीन.'

दारु घोटाळ्याची चौकशी होणार आहे

दिल्ली उत्पादन शुल्क धोरण प्रकरणात आरोपपत्र दाखल केल्यानंतर जवळपास तीन महिन्यांनी सीबीआयने उपमुख्यमंत्री मनीष सिसोदिया (Manish Sisodia) यांना चौकशीसाठी बोलावले आहे, असे अधिकाऱ्यांनी शनिवारी सांगितले.

ते म्हणाले की, सिसोदिया यांना रविवारी चौकशीसाठी बोलावण्यात आले आहे. मात्र, आरोपपत्रात आरोपी म्हणून त्यांचे नाव नाही. अटक करण्यात आलेले व्यापारी विजय नायर आणि अभिषेक बोईनपल्ली यांच्यासह सात आरोपींचा आरोपत्रात समावेश आहे.

तसेच, दारु विक्रेत्यांना परवाने देण्याचे दिल्ली सरकारचे धोरण काही विक्रेत्यांच्या हिताचे असल्याचा आरोप करण्यात आला आहे.