देशात आगामी काळात पाच राज्यांमध्ये विधानसभा निवडणुका होत आहेत. त्यामुळे या पाच राज्यांमधील राजकीय वातावरण चांगलंच तापलं आहे. या पाच राज्यांमध्ये पंजाब राज्याचाही समावेश आहे. पंजाबमधील राजकीय वातावरण मागील काही दिवसांपूर्वी पंतप्रधान नरेंद्र मोदी यांच्या सुरक्षेवरुन चांगलंच ढवळून निघालं होतं. यातच आता पंजाब लोक काँग्रेसचे अध्यक्ष आणि माजी मुख्यमंत्री कॅप्टन अमरिंदर सिंग (Capt. Amarinder Singh) यांनी रविवारी स्पष्ट केले की, पाकिस्तानचे पंतप्रधान इम्रान खान (Imran Khan) आणि त्यांच्या निकटवर्तीयांनी 2017 मध्ये पक्षाने मोठा विजय मिळवला तेव्हा नवज्योतसिंग सिद्धू (Navjyot Singh Sidhu) यांची मंत्री म्हणून नियुक्ती करण्यासाठी लॉबिंग केले होते. (Capt Amarinder Singh Said That Navjot Singh Sidhu Was Lobbied From Pakistan To Become A Minister)

कॅप्टन यांच्या म्हणण्यानुसार, ‘’पाकिस्तानचे (Pakistan) पंतप्रधान इम्रान खान यांनी फोनवर पाठवलेल्या मेसेजमध्ये सिद्धूला मंत्री बनवण्याची लेखी शिफारस केली होती. मी इम्रान खान यांना कधीही भेटलो नव्हतो किंवा त्यांना वैयक्तिकरित्या ओळखत नसल्यामुळे, पंजाबमध्ये काँग्रेसच्या विजयानंतर लगेचच असा संदेश पाहून मला आश्चर्य तर वाटले. परंतु एखाद्या व्यक्तीला राज्यमंत्रिपद मिळावे, याचाही धक्काही बसला. दुसऱ्या देशाचे पंतप्रधान आणि त्यांचे निकटवर्तीय अशाप्रकारे दबाव आणत आहेत.’’