बिहारची राजधानी पाटणा येथून एक धक्कादायक घटना समोर आली आहे. प्रसिद्ध उद्योगपती गोपाल खेमका यांची गोळ्या घालून हत्या करण्यात आली. खेमका कारमधून उतरून अपार्टमेंटमध्ये प्रवेश करत असताना शुक्रवारी (०४ जुलै) रात्री ११ च्या सुमारास ही घटना घडली. दबा धरून बसलेल्या गुन्हेगारांनी खेमका यांच्यावर गोळीबार करुन घटनास्थळावरुन पळ काढला.

उद्योगपती गोपाल खेमका यांना गोळी लागल्यानंतर ते खाली पडले. त्यांना तातडीने रुग्णालयात दाखल करण्यात आले पण, डॉक्टरांनी त्यांना मृत घोषित केले. व्यापारी खेमक यांच्या हत्येचा कट बेउर तुरुंगात रचला गेल्याची माहिती समोर आली असून, पाटणा पोलिसांची विविध पथके सध्या तुरुंगात छापा टाकत आहेत.

खेमका यांच्या हत्येच्या घटनेचे सीसीटीव्ही फुटेजही समोर आले आहे. खेमका यांना गोळा झाडून गुन्हेगार घटनास्थळापासून फरार झाल्याचे व्हिडिओत स्पष्टपणे दिसत आहे. सध्या पोलीस संपूर्ण प्रकरणाचा तपास करत आहेत आणि मारेकऱ्यांच्या शोधात अनेक ठिकाणी छापे टाकले जात आहेत.

या घटनेची गंभीर दखल बिहारच्या मुख्यमंत्री नितीश कुमार आणि उपमुख्यमंत्री सम्राट चौधरी यांनी घेतली आहे. खेमका यांची हत्या करणाऱ्या गुन्हेगारांना माफ केले जाणार नाही व त्यांच्यावर कठोर कारवाई केली जाईल, असे उपमुख्यमंत्री चौधरी म्हणाले.

कायदा हातात घेणाऱ्यांना पोलिस सोडणार नाहीत. शिवाय ज्या अधिकाऱ्यांच्या निष्काळजीपणामुळे ही घटना घडली त्यांना देखील सोडले जाणार नाही, असे मुख्यमंत्री नितीश कुमार यांनी स्पष्ट केल्याचे चौधरी म्हणाले. या घटनेचा तपास करण्यासाठी एसआयटीची स्थापना करण्यात आली असून, घटनेचा सखोल तपास केला जाईल, असेही चौधरी यांनी स्पष्ट केले आहे.