BSF Tripura: त्रिपुरातील भारत-बांगलादेश सीमेवर दहशतवादी गटाने केलेल्या हल्ल्यात सीमा सुरक्षा दलाचा (BSF) एक जवान शहीद झाला. ही माहिती देताना बीएसएफच्या सूत्रांनी सांगितले की, या हल्ल्यामागे एका संशयित अतिरेक्याचा हात आहे. हा हल्ला उत्तर त्रिपुरातील दुर्गम खांगलांग सीमा चौकीजवळ झाला. हा भाग त्रिपुरा, मिझोरम आणि बीएसएफ यांच्या त्रिसंबंधातील आहे.

अधिकाऱ्यांनी दिलेल्या माहितीनुसार, कांचनपूर उपविभागातील सीमा-2 चौकी परिसरात बीएसएफचे एक पथक ऑपरेशनवर होते, तेव्हा बांगलादेशकडून गोळीबार सुरू झाला. पोलीस अधीक्षक (SP) किरण कुमार म्हणाले, “बांगलादेशातील रंगमाटी हिल्स जिल्ह्यातील जुपुई भागातून जोरदार सशस्त्र अतिरेक्यांच्या एका गटाने बीएसएफ जवानांवर गोळीबार केला. जवानांनी प्रत्युत्तर दिल्याने दोन्ही बाजूंमध्ये चकमक सुरू झाली. या दरम्यान, चकमकीत एका बीएसएफ जवानाला चार गोळ्या लागल्या."

घटनास्थळी पोहोचलेले कुमार म्हणाले की, बीएसएफने केलेल्या समन्वित प्रत्युत्तरामुळे अतिरेकी फारसे नुकसान करू शकले नाहीत. या घटनेनंतर भारत-बांगलादेश सीमेवर सुरक्षा वाढवण्यात आली आहे. परिसरात मोहीमही तीव्र करण्यात आली आहे. आवश्यक कारवाईसाठी आम्ही या विषयावर बॉर्डर गार्ड बांगलादेशसोबत (BGB) चर्चा करू.