Congress Files: बीबीसीने प्रदर्शित केलेल्या इंडिया: द मोदी क्वेश्चन या दोन भागांच्या माहितीपटावरुन देशात मोठा वाद निर्माण होता. आता भाजपने काँग्रेसवर भ्रष्टाचाराचा आरोप करत एक व्हिडिओ प्रदर्शित केला आहे.

महत्वाचे म्हणजे याला काँग्रेस फाइल्स असे नाव दिले आहे. या व्हिडीओमध्ये काँग्रेसने जनतेच्या कष्टाने कमावलेल्या 48 ट्रिलियन 20 अब्ज 69 कोटी रुपयांची लूट केल्याचं म्हटले आहे. यामध्ये कोळशापासून 2-जी आणि कॉमनवेल्थ घोटाळ्याचा उल्लेख करण्यात आला आहे.

काँग्रेसच्या घोटाळे आणि भ्रष्टाचाराची किंमत देशाला चुकवावी लागली आहे. काँग्रेसमुळेच आपला देश प्रगती आणि विकासाच्या मार्गावर मागे पडला आहे, असंही भाजपने म्हटले आहे.

दरम्यान, बीबीसीने प्रदर्शित केलेल्या इंडिया: द मोदी क्वेश्चन या डॉक्युमेंट्रीच्या पहिल्या भागात नरेंद्र मोदींच्या राजकारणातील सुरुवातीच्या टप्प्याचा मागोवा घेण्यात आलेला आहे. ज्यामध्ये मोदी हे भारतीय जनता पक्षात पुढे जात गुजरातच्या मुख्यमंत्रिपदापर्यंत पोहोचतात.

या दरम्यान, 2002 साली गुजरातमध्ये झालेल्या जातीय दंगलीत 1 हजाराहून अधिक लोक मारले गेले. या प्रकरणाचाही उल्लेख या डॉक्युमेंट्रीत आहे.

या माध्यमातून गुजरातमध्ये झालेल्या दंगलीत राज्याचे मुख्यमंत्री म्हणून मोदींनी काय भूमिका पार पाडली असा प्रश्न विचारण्यात आला होता. ही मालिका प्रदर्शित झाल्यानंतर केंद्राने यावर बंदी घातली होती. मात्र त्यानंतर अनेक ठिकणी बेकायदेशीरपणे ही मालिका बघण्यात आली होती.

केंद्राच्या निर्णयाला आव्हान देणारी याचिका सर्वोच्च न्यायालयात दाखल करण्यात आली होती. याबरोबरच आता भाजपने कॉग्रेसबद्दल जारी केलेल्या व्हिडिओचा काय परिणाम होणार, कॉग्रेस यावर काय प्रतिक्रिया देणार हे पाहणे महत्वाचे ठरणार आहे.