वेस्ट इंडिजचा सुपरस्टार आंद्रे रसेल सध्या मेजर लीग क्रिकेट २०२५ मध्ये लॉस एंजेलिस नाईट रायडर्सकडून खेळत आहे. आता त्याने वॉशिंग्टन फ्रीडमविरुद्ध खेळताना एक छोटी पण आक्रमक खेळी केली आहे. रसेलने १३ चेंडूत ३० धावा केल्या आहेत, ज्यामध्ये तीन षटकारांचा समावेश आहे. यासह त्याने टी२० क्रिकेटमध्ये ७५० षटकार पूर्ण केले आहेत.

आंद्रे रसेल टी२० क्रिकेटमध्ये ७५० षटकार मारणारा तिसरा फलंदाज बनला आहे. त्याच्या आधी ख्रिस गेल आणि किरॉन पोलार्ड यांनी अशी कामगिरी केली आहे. गेलने टी२० क्रिकेटमध्ये एकूण १०५६ षटकार मारले आहेत. तो टी२० क्रिकेटमध्ये सर्वाधिक षटकार मारणारा फलंदाज देखील आहे. त्याच वेळी पोलार्डने ९१६ षटकार मारले आहेत.

आंद्रे रसेलची गणना जगातील सर्वोत्तम अष्टपैलू खेळाडूंमध्ये होते. आतापर्यंत त्याने ५५८ टी-२० सामन्यांमध्ये एकूण ९२२७ धावा केल्या आहेत, ज्यामध्ये त्याच्या बॅटने दोन शतके आणि ३२ अर्धशतके झळकावली आहेत.

या दरम्यान त्याने ६१० चौकार आणि ७५१ षटकार मारले आहेत. रसेल हा टी-२० क्रिकेटमध्ये सर्वाधिक षटकार मारणारा तिसरा फलंदाज आहे.

टी-२० क्रिकेटमध्ये सर्वाधिक षटकार मारणारे फलंदाज

• ख्रिस गेल- १०५६ षटकार

• किरोन पोलार्ड- ९१६ षटकार

• आंद्रे रसेल- ७५१ षटकार

• निकोलस पूरन- ६४१ षटकार

• अ‍ॅलेक्स हेल्स- ५६३ षटकार

आंद्रे रसेलच्या संघाचा पराभव

मेजर क्रिकेट लीग २०२५ मध्ये लॉस एंजेलिस संघाने प्रथम फलंदाजी करताना २१३ धावा केल्या. आंद्रे फ्लेचरने संघासाठी १०४ धावांची खेळी केली. त्याच्याशिवाय उन्मुक्त चंदने ४१ धावा केल्या. आंद्रे रसेलने ३० धावांचे योगदान दिले.

या खेळाडूंमुळेच संघाला मोठी धावसंख्या उभारता आली. नंतर, मिचेल ओवेन्स (४३), ग्लेन मॅक्सवेल (४२) आणि ग्लेन फिलिप्स (३३) यांनी वॉशिंग्टन फ्रीडमकडून चांगली फलंदाजी केली आणि संघाने २० व्या षटकाच्या शेवटच्या चेंडूवर लक्ष्य गाठले.