अरुणाचल प्रदेशच्या दौऱ्यावर असलेले गृहमंत्री अमित शहा यांनी एका कार्यक्रमात काँग्रेसवर हल्लाबोल केला. 'काँग्रेसचे लोक आंधळे होऊन विकास शोधत आहेत. राहुल बाबा, डोळे उघडा... इटालियन चष्मा काढा आणि भारतीय चष्मा घाला, मग तुम्हाला कळेल या 8 वर्षांत काय झाले आहे." असे राहुल गांधींची खिल्ली उडवत शहा म्हणाले.

अमित शहा इथेच थांबले नाहीत, तर काँग्रेसवर हल्लाबोल करताना ते म्हणाले की, काँग्रेसने यापूर्वी ईशान्येत अनेक लढाया केल्या होत्या. संपूर्ण ईशान्येमध्ये 2019 ते 2022 पर्यंत 9 हजार 600 अतिरेक्यांनी शस्त्रे टाकून सामान्य जीवन जगण्याचे काम केले आहे. आता काही दिवसांत दोन्ही राज्यांमधील सीमावादही संपुष्टात येणार आहे, असे शहा म्हणाले.

राज्यात रस्त्यांचे जाळे विणले

अमित शाह अरुणाचल प्रदेशच्या दोन दिवसांच्या दौऱ्यावर आहेत. यावेळी गृहमंत्री अमित शहा म्हणाले की, राज्यातील दूरवरच्या भागांना जोडण्यासोबतच आम्ही संपूर्ण राज्यात रस्त्यांचे जाळे विणले आहे. मी 2 दिवस राज्यात आहे आणि नमसाई जिल्ह्यातील लोकांशी संवाद साधत आहे, पण मला एक गोष्ट मान्य करावी लागेल की मी देशातील प्रत्येक ठिकाणी भेट दिली आहे परंतु संपूर्ण देशातील सर्वात सुंदर ठिकाण जर असेल तर, ते अरुणाचल प्रदेश आहे.

एवढेच नाही तर अरुणाचलचे लोक कुठेही भेटले तर लगेच जय हिंद म्हणत त्यांना शुभेच्छा देतात. देशप्रेमाने ओतप्रोत भरलेली अभिवादनाची ही पद्धत या राज्याशिवाय देशात कुठेही नाही, असे म्हणत शहा यांनी राज्यातील लोकांचे कौतूक केले.

2 मोठ्या व्यावसायिक विद्यापीठांचा करार

राज्यातील विकासाबाबत बोलताना अमित शहा म्हणाले की, दोन मोठ्या व्यावसायिक विद्यापीठांमध्ये करार झाला आहे. त्यांनी सांगितले की मोदीजींनी संरक्षण क्षेत्राशी निगडीत 2 मोठी व्यावसायिक विद्यापीठे पुढे आणली आहेत. एक राष्ट्रीय न्यायवैद्यक विज्ञान विद्यापीठ आणि दुसरे राष्ट्रीय संरक्षण विद्यापीठ. नॅशनल डिफेन्स युनिव्हर्सिटी हे संरक्षण क्षेत्रात तंत्रज्ञानाने सुसज्ज तंत्रज्ञ विकसित करणारे विद्यापीठ आहे. यासोबतच आपल्या लष्करी आणि निमलष्करी दलांना प्रशिक्षित मनुष्यबळ देण्यासाठी हे विद्यापीठ आहे, असे शहा म्हणाले.