कधीकधी एक छोटीशी चूक तुमचा जीवावर बेतू शकते. नोएडा-ग्रेटर नोएडा एक्स्प्रेस वेवरही असाच काहीसा प्रकार घडला आहे. कारमध्ये ठेवलेल्या पाण्याच्या बाटलीमुळे इंजिनिअरला जीव गमवावा लागला.

दिल्लीत राहणारा अभिषेक झा हा अभियंता आपल्या मित्रासोबत ग्रेटर नोएडाला जात होता. यावेळी त्याची कार रस्त्याच्या कडेला उभ्या असलेल्या ट्रकला जाऊन धडकली. यामध्ये त्याचा मृत्यू झाला. तर त्याचा मित्र गंभीर जखमी झाला. अपघाताचे कारण वाहनातील पाण्याची बाटली असल्याचे पोलिसांनी प्रथमदर्शनी सांगितले.

पोलिसांनी पुढे सांगितले, अभिषेक हा कार चालवत होता. यावेळी सीटच्या मागे ठेवलेली पाण्याची बाटली अभिषेकच्या पायाखालून सरकली. ट्रक जवळ येताच त्याने गाडी थांबवण्यासाठी ब्रेक मारला. मात्र, ब्रेक पेडलखाली पाण्याची बाटली आल्याने ब्रेक अडकला अन् कार ट्रकला धडकली. अभिषेक झा ग्रेटर नोएडा येथील एका कंपनीत नोकरीला होता. अभिषेक आणि त्याचा मित्र दोघेही नोएडाहून ग्रेटर नोएडाला जात होते. सेक्टर 144 जवळ रस्त्याच्या कडेला उभ्या असलेल्या ट्रकला जाऊन कार धडकली.