Kanpur Money Heist SBI Gold Theft: नेटफ्लिक्स या ओटीटी प्लॅटफॉर्मवरील स्पॅनिश क्राईम थ्रिलर वेबसिरीज मनी हाईस्टप्रमाणेच कानपूरमध्ये बोगदा खोदून चक्क बँकेतून सोने लुटण्यात आल्याचा प्रकार उघडकीस आला आहे. सचेंडी येथील एसबीआय बँकेत चोरीची घटना घडली. चोरट्यांनी बँकेच्या मागून 8 फूट बोगदा खोदून सुमारे 2 किलो सोने नेले.

बुधवारी रात्री ही घटना घडली असून चोरट्यांना हा बोगदा खोदण्यासाठी 15 दिवस लागले असतील, असा अंदाज पोलिसांनी व्यक्त केला आहे. हा बोगदा थेट बँकेच्या स्ट्राँगरूममध्ये उघडत होता. त्यानंतर ड्रिल मशिनने फरशी तोडून आत प्रवेश केला. स्ट्राँग रूमचे लॉकर गॅस कटरने कापून सुमारे दोन किलो सोने चोरले. चोरट्यांनी एवढ्या सफाईने काम केले की बँकेचा अलार्मही वाजला नाही. गुरुवारी सकाळी बँकेचे कर्मचारी पोहोचले असता हा प्रकार उघडकीस आला.

सोने नेले, मात्र लाखोंची रोकड मागे राहिली. सोन्याशेजारी आणखी एक बॉक्स ठेवण्यात आला होता. त्यात 35 लाख रुपये होते, मात्र चोरट्यांनी त्याला हातही लावला नाही. शाखा व्यवस्थापक नीरज राय यांनी सांगितले की, या बँकेच्या मागे घर नाही आणि कोणीही राहत नाही. चोरटे बोगदा खोदून खोदकाम करत असताना कोणालाही सुगावा लागला नाही. या बँकेसमोर पोलीस चौकीही आहे. घटनेच्या रात्रीही रात्री 11 ते 1 वाजेपर्यंत पोलिसांचा बंदोबस्त होता. तरीही धूर्त चोरट्यांनी सहज बँकेत चोरी केली.

20 दिवसांपूर्वी बँक व्यवस्थापनाने भिंतीत सोन्याची तिजोरी आणि रोकड तिजोरी लावली होती. या कामासाठी मजूर-मास्त्री स्ट्राँग रूमच्या आत गेले होते. सर्व लेबर मेकॅनिकचीही सखोल चौकशी केली जात आहे. चोरीला गेलेले सोने हे सोनेकर्ज घेतलेल्या २९ जणांचे आहे. सोन्याच्या कर्जापोटी ते बँकेत ठेवले होते. त्यांचाही पोलिस शोध घेत आहेत. चोरट्यांनी बँकेचे सर्व सीसीटीव्ही कॅमेरे बंद केले होते. बँक कर्मचाऱ्यांवर पोलिसांना संशय असल्यामुळे पोलिस प्रत्येक कर्मचाऱ्याचे लोकेशन आणि कॉल डिटेल्स तपासत आहेत.