Governement Jobs: नोकरी हवी असणाऱ्यांना नोकरी देणाऱ्यांपर्यंत वेगाने पोहचविण्यासाठी सरकारने रोजगार मेळाव्यांची नीती स्विकारली आहे. अशा रोजगार मेळाव्यांमधून 1.47 लाख रोजगार दिले गेले आहेत. त्यात प्राध्यापक, कर निरीक्षक, मल्टी टास्किग कर्मचारी यांचा समावेश आहे, अशी माहिती केंद्रीय कार्मिक मंत्रालयाचे राज्यमंत्री जितेंद्र सिंह यांनी गुरुवारी राज्यसभेत लिखित उत्तरातून दिली.

मंत्री जितेंद्र सिंह म्हणाले की, "देशभरात रोजगार मेळा कार्यक्रम आयोजित केले जात आहेत आणि आतापर्यंत विविध केंद्रीय मंत्रालये/विभाग/केंद्रीय सार्वजनिक क्षेत्रातील उपक्रम (पीएसयू)/ स्वायत्त संस्था/ सार्वजनिक क्षेत्रातील बँका इत्यादींद्वारे सुमारे 1.47 लाख नवीन नियुक्ती करण्यात आल्या आहेत."

कॉन्स्टेबल, शिक्षक, प्राध्यापक, परिचारिका, नर्सिंग अधिकारी, डॉक्टर, फार्मासिस्ट, रेडिओग्राफर आणि इतर तांत्रिक आणि पॅरामेडिकल पदे, उपनिरीक्षक, निम्न विभागीय लिपिक, लघुलेखक, वैयक्तिक सहाय्यक, आयकर निरीक्षक, ग्रामीण डाक सेवक, मल्टी टास्किंग कर्मचारी इ. लोकांचाही या रोजगार मेळाव्यात समावेश होता, अशी माहिती मंत्र्यांनी उत्तरात दिली आहे.

"रिक्त पदांवर भरती ही एक निरंतर चालणारी प्रक्रिया आहे. विभागाकडून नोंदवलेल्या रिक्त जागा भरल्या जातात तेव्हा काही नवीन जागा निर्माण होता. केंद्र सरकारची विविध मंत्रालये/विभाग आणि त्यांच्या संलग्न आणि अधीनस्थ कार्यालयांमधील कर्मचार्‍यांची सेवानिवृत्ती, राजीनामा, मृत्यू, पदोन्नती इत्यादींमुळे जागा रिक्त होत असतात, असेही उत्तरात म्हटले आहे.

केंद्रीय मंत्रालये/विभाग/केंद्रीय सार्वजनिक क्षेत्रातील उपक्रम (पीएसयू)/स्वायत्त संस्था/सार्वजनिक क्षेत्रातील बँका इत्यादी, थेट किंवा केंद्रीय लोकसेवा आयोग, रेल्वे भरती मंडळ आणि कर्मचारी निवड आयोग इत्यादी भरती एजन्सीद्वारे पदभरती केली जाते. ही रिक्त पदे वेळोवेळी भरली जावीत, असे मंत्री म्हणाले. दरम्यान, आणखी एका उत्तरात सिंह म्हणाले की, रोजगार मेळा पुढील रोजगार आणि स्वयंरोजगार निर्मितीमध्ये प्रोत्साहन देऊ शकतो. त्याचा लाभ तरूणांना होईल. त्यातून तरूणांना रोजगार संधीही मिळेल.