चिराग कामत

'Water Color Artists Association of Goa' जुन्या म्हापसा शहराची जी चिन्हे आज अस्तित्वात आहेत, त्यात, विस्मृतीत गेलेल्या 'अलंकार' सिनेमागृहाजवळचे 'कॅफे प्रशांत' हे ठिकाण अजूनही आपला आब राखून आहे.

एके काळी अनेक युवा मनाची स्पंदने या कॅफेमधील भाजी-पावचा आस्वाद घेत मनसोक्तपणे प्रकट झालेली आहेत. अजूनही तो काळ आठवून या कॅफेत पाय टाकणारी मंडळी आहेत.

नव्या ग्राहकांमध्येही 'कॅफे प्रशांत' अस्सल गोमंतकीय भाजी-पावासाठी ओळखले जाते. 'वॉटर कलर आर्टिस्ट असोसिएशन ऑफ गोवा'च्या चिराग कामत याने हा कॅफे आपल्या जलरंगांमधून परिणामकपणे रंगवला आहे.

जुन्या म्हापसामधील काही शेवटच्या शिलेदारांपैकी असलेले हे ठिकाण, चिराग याने अशा कोनातून रंगवले आहे की त्यामुळे चित्राचा भाग बनलेले कॅफेचे कौलारू छप्पर, पत्र्यांची शेड यातून या कॅफेच्या इमारतीची एकेकाळची डौलदार संपन्नता लक्षात येते.

पार्श्वभागी असलेल्या उंच आधुनिक इमारतीच्या भिंतीसमोर आपले अंग सावरत उभी असलेली कॅफेची ही ऐतिहासिक इमारत, समोरच्या कलणाऱ्या विजेच्या खांबासोबत कोणता संवाद साधत असेल? त्याच्या कलण्यात ती स्वतःचे भविष्यही पहात असेल काय?

वॉटर कलर असोसिएशनच्या 9 सदस्यांनी, गेल्या रविवारी म्हापसा शहरात आयोजित केल्या गेलेल्या बाह्यस्थळ चित्रकला सत्रात भाग घेतला.