Lighthouse of Betul बेतुलच्या किनाऱ्यापासून जवळच असलेल्या बाराडी टेकडीवरच्या दीपगृहाला तुम्ही कधी भेट दिली आहे का? सायंकाळी 4 ते 5 या काळात केवळ 20 रुपये शुल्क भरून तुम्ही या दीपगृहामध्ये प्रवेश करू शकता.

या दीपगृहामध्ये प्रवेश करताना ‘काय करावे’ आणि ‘काय करू नये’ याच्या सूचना तिथल्या माणसांकडून देण्यात येतात. (त्याचे पालन करणे अर्थातच योग्य असते.) ‘कठड्याच्या फार जवळ जाऊ नका’ ही त्यापैकी अर्थातच एक महत्त्वाची सूचना असते.

दीपगृह चढून वर आलात की दूर पश्चिमेला साळ नदी समुद्राला जाऊन मिळतानाचे विहंगम दृश्य आपल्याला प्रभावित करते.

नदीच्या किनाऱ्याने रांगेने असलेल्या माडांचे शेंडे, दूरवरून समुद्राच्या लाटांची रांगेने किनाऱ्याच्या दिशेने होत असणारी वाटचाल, बेतुलच्या टोकाला असलेले वाळूचे शुभ्र टोक, नदीच्या रुंद विस्तारात हेलकावणाऱ्या बोटी या साऱ्यांची मिळून एक बिलोभनीय जादू तिथे तयार झालेली असते.

सूर्य पश्चिमेला झुकलेला असल्यामुळे पिवळसर प्रकाशाचे गारुड तिथल्या सबंध अवकाशात पसरलेले असते. अर्थात या दीपगृहावर पाचनंतर राहता येत नसल्यामुळे तिथल्या अपूर्व सूर्यास्ताची साक्ष होण्याची संधी मात्र हुकते. विरुद्ध बाजूला जाताच दूर पूर्व दिशेला दिसणाऱ्या पश्चिम घाटामधील डोंगरांच्या नीळ्या रांगांचे दृश्यही आपल्याला भारून टाकते.