गोवा: नाट्यशिबिरांचा मोसम पुन्हा सुरू होतोय. मध्यंतरीच्या ठप्प झालेल्या काळात, बालवयासाठी मौजेची आणि धामधुमीची ठरणारी बालनाट्य शिबिरे बंदच झाली होती. साखळी येथे ‘खेडेकर सभागृहा’त येत्या 27 एप्रिलपासून ‘अभय थिएटर अकादमी’तर्फे 10 ते 15 या वयोगटातील मुलांसाठी बालनाट्य शिबिर सुरू होत आहे. रोज सकाळी 9 ते दुपारी 1 असा कालावधी असणारे हे शिबिर 15 मेपर्यंत चालेल. रंगकर्मी अभय जोग हे या नाट्यकार्यशाळेचे संचालक असतील.

‘नाटक’ या माध्यमासाठी आवश्यक असणारे घटक- शारीरिक हालचाली, मुकाभिनय, वाचिक अभिनय, स्मरणशक्ती, उत्स्फूर्तता, समयसूचकता, निरीक्षण क्षमता, सांघिकता आदींचा विकास या नाट्यशिबिरात वेगवेगळ्या नाट्यखेळांद्वारे होईल. व्यक्तिमत्त्व विकास हेदेखील या नाट्यशिबिराचे उद्दिष्ट राहील. नाट्यशिबिराचे फलित म्हणून एक दीर्घांक या शिबिराच्या समारोप समारंभात सादर करण्यात येईल. या नाट्यशिबिरात भाग घेण्यासाठी इच्छुकांनी नोंदणी करणे आवश्यक आहे.