टाटा समूह लवकरच प्रसिद्ध ब्रँड बिस्लेरी खरेदी करणार आहे. टाटा 7000 कोटी रुपयांमध्ये बिसलेरी ब्रँड खरेदी करण्याच्या तयारीत आहे. प्रकृती ठीक नसल्याने 82 वर्षांचे बिस्लेरीचे अध्यक्ष रमेश चौहान यांनी कंपनी विकण्याचा निर्णय घेतला आहे. या कंपनीत त्यांची मुलगी जयंती चौहान यांना व्यवसायात विशेष रस नाही.

वडिलांचा व्यवसाय चालवण्यास नकार दिल्याने जयंती चौहान यांची सध्या चर्चा होत आहे. तसेच, त्यांनी कंपनीसाठी नकार का दिला याची देखील कारणे अनेकांना जाणून घ्यायची आहेत.

- जयंती चौहान बिस्लेरी इंटरनॅशनलच्या विद्यमान उपाध्यक्ष (Vice Chairperson of Bisleri Internationa) आहेत. त्यांचे बालपण दिल्ली, मुंबई आणि न्यूयॉर्क शहरात गेले आहे. शालेय व महाविद्यालयीन शिक्षण झाल्यानंतर त्यांनी फॅशन इन्स्टिट्यूट ऑफ डिझाईन अँड मर्चेंडाइझिंग (FIDM), लॉस एंजेलिसमध्ये प्रवेश घेतला. फॅशन स्टाइलिंगचा अभ्यास करण्यासाठी नंतर त्या इस्टिटूटो मॅरांगोनी मिलानो (Istituto Marangoni Milano) येथे गेल्या.

- बिस्लेरीच्या अधिकृत वेबसाइटनुसार, जयंती चौहान "JRC" म्हणून प्रसिद्ध आहेत. वडिलांचे मार्गदर्शन आणि नेतृत्वाखाली 24 वर्षांची असताना त्यांनी कंपनीत कामाला सुरूवात केली.

- जयंती चौहान यांनी दिल्ली कार्यालयाचा कार्यभार स्वीकारला. कारखान्याचे नूतनीकरण, ऑटोमेशन असे बदल त्यांनी कंपनीत केले. याशिवाय त्यांनी एचआर, विक्री आणि विपणन यांसारख्या विभागांची पुनर्रचना केली. 2011 मध्ये त्यांनी मुंबई कार्यालयाचा कार्यभार स्वीकारला.

- जयंती चौहान यांनी बिस्लेरी मिनरल वॉटर, वेदिका नॅचरल मिनरल वॉटर फ्रॉम हिमालय, फिजी फ्रूट ड्रिंक्स आणि बिसलेरी हँड प्युरिफायर यांचा व्यवसाय सुरळीत करण्यात मोठे योगदान दिले आहे.

- जयंती सध्या लंडनमध्ये राहतात. बिस्लेरी कंपनीचे देशभरात 122 ऑपरेशनल प्लांट आहेत तर, 4,500 पेक्षा जास्त वितरक आहेत. बिसलेरी कंपनीची जबाबदारी घेण्यास त्यांनी नकार दिला आहे. 'प्रत्येक कथेच्या दोन बाजू असतात.' असे जयंती यांनी आपल्या लिंक्डइन प्रोफाइलवर लिहिले आहे.