आयकर रिटर्न (ITR) भरणाऱ्यांसाठी एक दिलासादायक बातमी आहे. केंद्रीय प्रत्यक्ष कर मंडळाने (CBDT) आर्थिक वर्ष 2024-25 साठी आयटीआर दाखल करण्याची अंतिम मुदत वाढवली. आता ज्या करदात्यांची खाती ऑडिट झालेली नाहीत ((Non-Audit Taxpayers) ते 31 जुलै 2025 ऐवजी 15 सप्टेंबर 2025 पर्यंत आयटीआर दाखल करु शकतात. आयटीआर फॉर्ममध्ये अलिकडेच मोठे बदल, सिस्टम अपग्रेड आणि टीडीएस (टॅक्स डिडक्टेड अॅट सोर्स) क्रेडिटमधील त्रुटींमुळे सीबीडीटीने हा निर्णय घेतला. या मुदतवाढीचा उद्देश करदात्यांना योग्य आणि सुरळीत रिटर्न भरण्यासाठी अतिरिक्त वेळ देणे आहे.

सूट का देण्यात आली?

दरम्यान, यावर्षी आयटीआर फॉर्ममध्ये अनेक महत्त्वाचे बदल करण्यात आले आहेत. यासोबतच, आयकर फाइलिंग पोर्टलवर सिस्टम अपग्रेडचे कामही केले जात आहे. या तांत्रिक बदलांमुळे करदात्यांना वेळेवर योग्य माहिती भरण्यात अडचणी येत होत्या. याव्यतिरिक्त, अनेक करदात्यांना टीडीएस क्रेडिट जुळवण्यात अडचणी येत होत्या, ज्यामुळे चुकीची कर देयता दिसत होती.

पेनल्टीशिवाय आयटीआर दाखल करण्याची संधी

नवीन तारीख लागू झाल्यानंतर जर करदात्याने 15 सप्टेंबर 2025 पर्यंत आयटीआर दाखल केला तर त्याला कोणताही दंड भरावा लागणार नाही. याचा अर्थ असा की, आता करदात्यांना त्यांच्या कर जबाबदाऱ्या पूर्ण करण्यासाठी दंडाशिवाय अधिक वेळ मिळाला आहे.

कोणाला फायदा होणार?

या मुदतवाढीचा फायदा विशेषतः वैयक्तिक करदात्यांना आणि ज्यांच्या खात्यांचे ऑडिट करणे अनिवार्य नाही अशा लहान व्यवसायांना होईल. म्हणजेच, पगारदार वर्ग, फ्रीलांसर, छोटे व्यापारी, व्यावसायिक इ.