केंद्रीय अर्थमंत्री निर्मला सीतारामन यांनी अलिकडे 'इंडिया-यूएस बिझनेस अँड इन्व्हेस्टमेंट अपॉर्च्युनिटीज' या कार्यक्रमात हजेरी लावली. जागतिक आर्थिक दृष्टीकोन आव्हानात्मक आहे. जागतिक आर्थिक घडामोडींमुळे भारतीय अर्थव्यवस्था प्रभावित झाली आहे. पण, भारत जगातील सर्वात वेगाने वाढणाऱ्या प्रमुख अर्थव्यवस्थांपैकी एक आहे. भारतीय अर्थव्यवस्था येत्या 10 ते 15 वर्षांत जगातील तीन प्रमुख आर्थिक शक्तींपैकी एक असेल. असे निर्मला सीतारामन यांनी म्हटले आहे.

अर्थमंत्री निर्मला सीतारामन म्हणाल्या, "नैऋत्य मान्सूनच्या काळात झालेला सरासरीपेक्षा जास्त पाऊस, सार्वजनिक क्षेत्रातील गुंतवणूक, मजबूत कॉर्पोरेट क्षेत्र, ग्राहकांचा आत्मविश्वास, उत्तम व्यावसायिक उपक्रम आणि कोविड महामारीचा कमी झालेला प्रभाव यामुळे भारत विकासाच्या मार्गावर वाटचाल करत आहे. भारत जगातील सर्वात वेगाने वाढणारी प्रमुख अर्थव्यवस्था म्हणून उदयास येत आहे. नुकतेच यूकेला मागे टाकून भारत जगातील पाचवी सर्वात मोठी अर्थव्यवस्था बनली असून, पुढील 10-15 भारत जगातील तिसरी सर्वात मोठी आर्थिक शक्ती होईल."

उदयोन्मुख अर्थव्यवस्थांमध्ये सर्वाधिक गुंतवणूक भारतात येत आहे. कारण अनेक कंपन्या चीन-प्लस-वन धोरणाच्या पलीकडे पाहत आहेत. अनेक कंपन्या चीनमधील गुंतवणूक कमी करून पर्यायी भागीदार शोधत आहेत आणि त्यासाठी भारत अनुकूल भागीदार म्हणून पुढे येत आहे. असे अर्थमंत्री निर्मला सीतारामन म्हणाल्या. डिजिटल सेवांचे कौतुक करताना सितारमन यांनी डिजिटल मोडद्वारे सार्वजनिक सेवा यासाठी एक मजबूत व्यासपीठ यामुळे भारत गुंतवणुकीसाठी एक आकर्षक बनला आहे. सरकार या दिशेने सुधारणा करण्यासाठी कटिबद्ध आहे. असे निर्मला सीतारामन म्हणाल्या.