Union Budget 2023: केंद्रीय अर्थसंकल्पाच्या एक दिवस आधी अर्थमंत्री निर्मला सीतारामन यांनी अर्थव्यवस्थेचे वास्तविक चित्र दर्शविणारा आर्थिक पाहणी अहवाल काल संसदेत मांडला. जगातील वेगाने वृद्धींगत होणारी अर्थव्यवस्था म्हणून भारताचा दबदबा कायम राहील.

मात्र, रशिया-युक्रेन युद्धाचा परिणाम आणि जागतिक मंदीचे आव्हान पाहता, गतवर्षीच्या सात टक्क्यांच्या तुलनेत आगामी आर्थिक वर्षातील (2023-24) विकासदर साडेसहा टक्के राहील, असा अंदाज अहवालात वर्तविला आहे.

त्यामुळे विकास दर मंदावण्याचा अंदाज आहे. सोबतच, रोजगारात वाढ झाली असून महागाई देखील नियंत्रणात राहील, असे मधाचे बोटही लावले आहे. मावळत्या आर्थिक वर्षातील ढोबळ उत्पन्न वाढीचा दर सात टक्के राहील, असेही नमूद केले.