EPFO: कर्मचारी भविष्य निर्वाह निधी संस्थेने (EPFO) सर्व वापरकर्त्यांसाठी एक अलर्ट जारी केला आहे. ईपीएफओने आपल्या सर्व सदस्यांना सांगितले की, 'कोणत्याही खातेधारकाने चुकूनही खात्याशी संबंधित माहिती सोशल मीडियावर शेअर करु नये. यामुळे खातेदार मोठ्या फसवणुकीला बळी पडू शकतात. जर ईपीएफ खात्याची माहिती फसवणूक करणाऱ्यांच्या हाती लागली तर ते तुमच्या खात्यातून पैसे गायब करु शकतात.'

दरम्यान, ईपीएफओने म्हटले की, 'ईपीएफओ (EPFO) कधीही आपल्या सदस्यांना आधार, पॅन, यूएएन, बँक तपशीलांची माहिती विचारत नाही. जर कोणी फोन किंवा सोशल मीडियावर (Social Media) अशी माहिती मागितली तर काळजी घ्या आणि ती अजिबात शेअर करु नका. अशा फसव्या फोन कॉलला प्रतिसाद देऊ नका.'

फिशिंग ऑनलाइन फसवणूक

पीएफ (PF) खात्यात, लोकांची मोठी कमाई जमा केली जाते, जी लोक सेवानिवृत्तीच्या खर्चासाठी जमा करतात. फसवणूक करणाऱ्यांना हे चांगलेच ठाऊक आहे की, इथे त्यांना एका झटक्यात मोठी रक्कम मिळेल, म्हणून ते फिशिंग अटॅकद्वारे खात्यावर हल्ला करतात. वास्तविक, फिशिंग हा ऑनलाइन फसवणुकीचा एक भाग आहे, ज्यामध्ये ठेवीदारांना फसवले जाते. त्यांच्याकडून खात्याशी संबंधित आवश्यक माहिती मिळवली जाते आणि नंतर खाते साफ केले जाते.