नवी दिल्ली: केंद्र सरकारने दिवाळीपूर्वी केंद्रीय सरकारी कर्मचारी आणि पेन्शनधारकांना मोठी भेट दिली आहे. केंद्रीय कर्मचाऱ्यांसाठी सरकारने ३ टक्के महागाई भत्ता वाढवण्यास मान्यता दिली आहे. या वाढीसह एकूण महागाई भत्ता आता ५५ वरून ५८ टक्के झाला आहे. या निर्णयाचा फायदा सुमारे १.१५ कोटी केंद्र सरकारी कर्मचारी आणि पेन्शनधारकांना होणार आहे.

महागाई भत्त्यात ३ टक्के वाढ झाल्याने सरकारवर वार्षिक १०,०८४ कोटी रुपयांचा बोजा पडणार आहे. महागाई भत्ता (DA) आणि DR हे पगार आणि पेन्शनचे महत्त्वाचे घटक आहेत. सरकार वर्षातून दोनदा - जानेवारी आणि जुलैमध्ये - या भत्त्यांमध्ये सुधारणा करत असते.

सरकारी कर्मचारी जुलैपासून या केंद्र सरकारच्या घोषणेची आतुरतेने वाट पाहत असतात. दरम्यान, दिवाळीच्या काही दिवस आधी सरकारने केंद्रीय कर्मचारी आणि पेन्शनधारकांसाठी मोठी भेट दिली आहे.

महागाई भत्ता तीन टक्क्यांनी वाढल्याने दिवाळीच्या तोंडावर केंद्रीय कर्मचारी आणि निवृत्ती वेतनधारकांना मोठा लाभ होणार आहे. समजा कर्मचाऱ्याचे वेतन ६० हजार रुपये एवढे असून, त्याला ३३००० एवढा डीए मिळतो, तर तीन टक्के वाढीसह आता त्या कर्मचाऱ्याला ३४,३०० रुपये मिळतील याचा अर्थ कर्मचाऱ्याला १,८०० रुपये महागाई भत्ता वाढला आहे.