Watch Video: रात्रीच्या अंधारात बोटीत पाणी घुसले आणि 5 कर्मचाऱ्यांनी पळ काढला; मांडवीत फेरीबोट बुडाली

पणजी: मांडवी नंदीवरील चोडण येथील जेटीवर 'बेती' नावाची फेरीबोट सोमवारी पहाटे तीनच्या सुमारास अर्धवट स्थितीत बुडाली. या बोटीवर रात्रपाळीत काम करणाऱ्या पाच कर्मचाऱ्यांनी बोटीत पाणी घुसल्याचे पाहून पळ काढला आणि जीव वाचवला.

१) फेब्रुवारी महिन्यात या फेरीबोटीचे फिटनेस प्रमाणपत्र सर्वेअरने दिले होते, तरीही बोट बुडाल्याने त्याविषयी प्रश्न उपस्थित होत आहे. या घटनेची नदी परिवहन खात्याने गंभीर दखल घेतली असून, त्याची चौकशी केली जाईल, असे संचालक विक्रमसिंह राजेभोसले यांनी सांगितले.

२) खात्याचे मंत्री सुभाष फळदेसाई यांनी भेट दिली असून, त्यांनी बोटीवर कामाला असणाऱ्या कर्मचाऱ्यांशी चर्चा केली आहे. फेरीबोट बुडण्याची घटना कर्मचाऱ्यांच्या निष्काळजीपणामुळे की तांत्रिक कारणांमुळे हे तपासण्यासाठी तज्ज्ञांची मदत घेतली जाणार असल्याचे त्यांनी सांगितले.

३) फेरीबोट अचानक बुडते याचा अर्थ यंत्रणेत काहीतरी त्रुटी आहे. सरकारने या घटनेकडे गांभिर्याने बघावे तसेच दोषींवर कारवाई करावी, असे विरोधी पक्षनेते युरी आलेमाव यांनी म्हटले आहे.