Sunburn Festival: सनबर्नसाठी परवानगी न घेता तिकीटांची विक्री सुरु; आपकडून तक्रार दाखल!

राज्यात सनबर्न फेस्टिव्हलसाठी परवानगी नसताना तिकीटांची विक्री सुरु असल्याने आम आदमी पक्षाकडून तक्रार नोंदवण्यात आली आहे. पणजी पोलिस स्थानकात आम आदमी पक्षाचे गोवा प्रदेशाध्यक्ष अमित पालेकर यांनी तक्रार दाखल केली. राज्यात सनबर्न फेस्टिव्हलच्या आयोजनावरुन राजकीय वातावरण चांगलेच तापले आहे. आम आदमी पक्षाने दक्षिण गोव्यातील सनबर्नच्या आयोजनावर आक्षेप घेतला. काही दिवसांपूर्वी, सनबर्न फेस्टिव्हल ही गोव्याची संस्कृती नसल्याचे म्हणत पालेकर यांनी घणाघात केला होता. सनबर्नच्या माध्यमातून गोव्यात ड्रग्ज कल्चर फोफावेल असे पालेकर म्हणाले होते.