Sacorda News: साकोर्डातील नव्याने हॉटमिक्स केलेला रस्ता पुराच्या पाण्यात गेला वाहून!

राज्यात पुन्हा पावसानं दाणादाण उडवायला सुरुवात केली आहे. सातत्याने पडणाऱ्या पावसामुळे अनेक ठिकाणांहून पडझडीच्या घटना समोर येतायेत. म्हापसा, डिचोली येथे पावसानं हाहाकार उडवला आहे. यातच, तीन महिन्यांपूर्वी (मे महिन्यात) हॉटमिक्सिंग केलेला सावर्डे मतदारसंघांतील मधलावाडा साकोर्ड्यातील रस्ता रगाडा नदीच्या पुराच्या पाण्यात वाहून गेला. सध्या या रस्त्यावरील वाहतूक बंद करण्यात आली आहे. गेल्या दोन दिवसांपासून साकोर्डामध्ये पावसाची जोरदार बॅटिंग सुरु आहे. दरम्यान, रस्ता उखडल्यानंतर स्थानिकांनी सरकारवर रोष व्यक्त केला. साकोर्डात इतर ठिकाणीही अशाच प्रकारचे रस्ते बनवण्यात आल्याचे यावेळी स्थानिकांनी सांगितले. एवढ्यावरच न थांबता निकृष्ट दर्जाचे हॉटमिक्सिंग झाल्याचा आरोप करत स्थानिकांनी कंत्राटदाराच्या चौकशीची मागणीही केली.