गोव्यात 'सुपारी आंदोलन!' रवींद्र भवनातील मुख्य सभागृह बंद; कला राखण मांड आक्रमक

मडगाव: कला आणि संस्कृतीला वाहिलेले मडगावचे रवींद्र भवन सध्या वादाच्या भोवऱ्यात सापडले आहे. मुख्य सभागृह बंद असल्याने, तसेच कला प्रकारांचे नियमित वर्ग उपलब्ध नसल्याने 'कला राखण मांड' या संस्थेने गुरुवार, १० जुलै २०२५ रोजी सकाळी ११.३० वाजता रवींद्र भवनाविरुद्ध "सुपारी आंदोलन" पुकारले. या आंदोलनानंतर संस्थेने दावा केला आहे की, रवींद्र भवनचे अध्यक्ष राजेंद्र तालाक यांना 'पै तियात्रिस्त सभागृह' येथे सुरू असलेल्या कामाची नेमकी माहिती नाही, तसेच पुन्हा सुरू होण्याच्या तारखेबद्दल आणि नियमित कला वर्गांच्या सुरुवातीबद्दलही त्यांच्याकडे कोणतेही उत्तर नव्हते.

'कला राखण मांड'ने उपस्थित केलेल्या प्रश्नांवर अध्यक्षांनी ठोस उत्तरे दिली नाहीत, असा आंदोलकांचा आरोप आहे. रवींद्र भवनसारख्या सांस्कृतिक केंद्रात कला प्रकारांच्या शिक्षणाचे वर्ग बंद असणे आणि मुख्य सभागृह दीर्घकाळ बंद ठेवणे हे कलेच्या विकासासाठी हानिकारक आहे, असे 'कला राखण मांड'चे म्हणणे आहे. यामुळे कलाकार आणि कलाप्रेमींमध्ये तीव्र नाराजी पसरली. अध्यक्षांच्या या 'माहिती नसण्यामुळे' आंदोलकांनी आश्चर्य व्यक्त केले असून, रवींद्र भवनच्या कामकाजावर प्रश्नचिन्ह निर्माण केले आहे. या आंदोलनामुळे रवींद्र भवनच्या कारभारातील त्रुटी पुन्हा एकदा चव्हाट्यावर आल्या आहेत.