Narve, Masan Devi Jatra: नार्वेतील प्रसिद्ध मसणदेवीची जत्रेला उत्साहात सुरुवात

तळेवाडा- नार्वे येथील प्रसिद्ध मसणदेवीची जत्रा आज (20 ऑगस्ट) (मंगळवारी) पारंपरिक पद्धतीने मोठ्या भक्तीभावाने साजरी करण्यात आली. दरवर्षी श्रावण महिन्याच्या तिसऱ्या मंगळवारी ही जत्रा साजरी होते. या जत्रेला शंभरहून अधिक वर्षांची परंपरा आहे. या जात्रेचे वैशिष्ट्य म्हणजे ही जत्रा फक्त दिवसाच साजरी करतात. रात्रीच्यावेळी या परिसरात भूतांचा वावर असल्याची भक्तांची भावना आहे. त्यामुळे काळोख पडू लागल्यानंतर याठिकाणी कोणीच थांबत नाही. दुकानांची फेरीही हटवली जाते. मसणदेवीची जत्रा गोव्यासह अन्य राज्यातही प्रसिद्ध आहे. यंदाही वेगवेगळ्या भागातील हजारो भक्तगणांनी श्री मसणदेवीचे दर्शन घेवून देवीच्या चरणी आपली सेवा अर्पण केली. मनोकामना पूर्ण झालेल्या भक्तगणांनी देवीच्या चरणी नवसही फेडले. जत्रेनिमित्त यंदाही खाजे, खेळणी, चणे आदी वस्तूंच्या स्टॉलांची फेरी भरली होती. गर्दीवर नियंत्रण ठेवण्यासाठी वाहतूक विभागासह पोलिसही तैनात होते.