Mungul Gangwar: मुंगूल गँगवॉर प्रकरण, 12 आरोप्यांक दिलें आरोपपत्र; Video

मडगाव: मुंगूल  गँगवॉर प्रकरणी बारा संशयितांना आज गुरुवारी मडगावच्या न्यायालयात उभे करून त्यांच्यावरील आरोपपत्राची प्रत देण्यात आली. या प्रकरणातील उर्वरित अन्य संशयितांना पुढच्या मंगळवारी (ता. २५) न्यायालयात उभे करून वरील कायदेशीर सोपस्कार पार पाडले जातील.

या गॅंगवॉर प्रकरणी एकूण २८ संशयितांवर फातोर्डा पोलिसांनी मडगावच्या न्यायालयात आरोपपत्र दाखल केले आहे. एकूण ६२४ पानांचे हे आरोपपत्र आहे. यात ८० साक्षीदारांची यादीही जोडण्यात आली आहे.

या प्रकरणात वेल्ली डिकॉस्टा, अमोघ नाईक व प्रकाश कारभार हे फातोर्डा पोलिसांना शरण आले होते, तर अन्य संशयितांना पोलिसांनी अटक केली होती. १२ ऑगस्ट रोजी गँगवॉरची ही घटना घडली होती. वेल्ली व वोल्टर यांच्या गँगच्या संघर्षातून हे टोळीयुद्ध झाले होते. यात युवकेश सिंग व रफिक तैशान हे दोघे गंभीर जखमी झाले होते. कुख्यात गँगस्टर लॉरेन्स बिष्णोई याचा या  गँगवॉर प्रकरणी सहभाग असल्याचे तपासात आढळून आल्याने या घटनेचे गूढ वाढले होते.