Mayem Kayaking Service: मये तलावात 'कायाकिंग' बोटिंग सेवा सुरू

समुद्रकिनाऱ्यांसाठी प्रसिद्ध असलेल्या गोव्यात अन्य अनेक पर्यटनस्थळे असून, या पर्यटनस्थळांना नवसंजीवनी आणि पर्यटनाला चालना मिळण्याची गरज आहे. ‘गोवा बियोंड बीच’ संकल्पनेंतर्गत राज्यातील पर्यटन स्थळांचा विकास करून पर्यटकांना आकर्षित करणाऱ्या सुविधा उपलब्ध करून देण्यासाठी सरकारचा भर आहे, असे प्रतिपादन खासदार सदानंद शेट तानावडे यांनी केले.

जागतिक पर्यटनस्थळ असलेल्या मये तलावावर ''कायाकींग'' बोटिंग सुविधेच्या शुभारंभप्रसंगी खासदार तानावडे प्रमुख पाहूणे या नात्याने बोलत होते. पर्यटनाचा आस्वाद लुटण्यासाठी पर्यटन स्थळांना भेट देणाऱ्या पर्यटकांच्या सुरक्षेची काळजीही तेवढीच महत्वाची आहे, असेही तानावडे म्हणाले. आमदार केदार नाईक, आमदार प्रेमेंद्र शेट, कुंदा मांद्रेकर, कुलदीप आरोलकर, पुनम रिबो आदी उपस्थित होते.

खासदार, आमदार सहभागी!

सदानंद शेट तानावडे यांनी फीत कापून कायाकींग बोटिंग सेवेचा शुभारंभ केला. त्यांच्यासह प्रेमेंद्र शेट आणि केदार नाईक यांनी कायाकींग बोटिंगचा आनंद लुटला. पर्यटनखात्याच्या सहकार्याने पर्यटन महामंडळाचे उपव्यवस्थापक दीपक नार्वेकर यांनी सूत्रसंचालन केले. कोकण एक्स्पलोअर्सतर्फे ही ''कायाकींग बोटिंग'' सेवा सुरु केली आहे. यावेळी ग्रामस्थ, पर्यटक उपस्थित होते.