Lotulim Shipyard: ..आनीक 2 कामगारांक उपचारावेळार मरण, Video

मडगाव: रासई-लोटली येथील विजय मरीन शिपयार्डमध्ये झालेल्या दुर्घटनेत आज आणखी दोन कामगारांचा ‘गोमेकॉ’त उपचारादरम्यान मृत्यू झाला. यामुळे मृतांची संख्या आता पाचवर पोहोचली आहे. अभिषेक कुमार (२५) आणि मनीष चौहान (२०, दोघेही उत्तर प्रदेश) अशी मृतांची नावे असून त्यांच्यावर गेल्या आठ दिवसांपासून उपचार सुरू होते. महम्मद बाबुल आणि सुरेन्द्र कुमार हे दोघेही अद्याप गोमेकॉत उपचार घेत असून, त्यांची प्रकृती चिंताजनक असल्याची माहिती मायणा-कुडतरी पोलिसांनी दिली.

गेल्या शुक्रवारी (ता. १७) या शिपयार्डमधील सेरही मरीन वेसल बोटीवर वेल्डिंगचे काम सुरू असताना अचानक आगीचा भडका उडाला होता. त्यात सात कामगार गंभीररित्या भाजले गेले होते. यापैकी सेर अली महंमद अली आणि विनोद दिवान यांचा घटनास्थळीच मृत्यू झाला होता, तर संतोष कुमार याचा गोमेकॉत मृत्यू झाला होता. अभिषेक कुमार, मनीष चौहान, महम्मद बाबुल आणि सुरेन्द्र कुमार यांना तेव्हा गंभीर अवस्थेत दाखल करण्यात आले होते. त्यापैकी आज अभिषेक आणि मनीष या दोघांनी प्राण गमावले. या दुर्घटनेची प्रशासनाने गंभीर दखल घेतली असून, सध्या संबंधित शिपयार्ड सील करण्यात आले आहे.