Independence Day 2024: समान नागरी कायदा ही काळाची गरज- पंतप्रधान नरेंद्र मोदी

देशभरात काल (15 ऑगस्ट) स्वातंत्र्य दिन मोठ्या उत्साहात साजरा करण्यात आला. पंतप्रधान मोदी यांनी सलग 11 व्यांदा लाल किल्ल्यावर ध्वजारोहण केले. यावेळी त्यांनी आपल्या भाषणातून सरकार विकासाच्या दिशेने कसे मार्गक्रमण करत आहे याविषयी सांगितले. याशिवाय, त्यांनी देशात 'सेक्युलर सिव्हिल कोड' (समान नागरी कायदा) लागू करण्याची गरज असल्याचे मोठे वक्तव्य केले. पंतप्रधान मोदी म्हणाले की, 'धर्मावर आधारित भेदभाव दूर करण्यासाठी आणि लोकांना जाणवणारी दरी दूर करण्यासाठी सेक्युलर सिव्हिल कोड स्वीकारण्याची गरज आहे.' एवढ्यावरच न थांबता मोदींनी देशासाठी सेक्युलर सिव्हिल कोड किती आवश्यक आहे याविषयीही सांगितले. आपण गेल्या 75 वर्षांपासून जातीय नागरी संहितेसह जगत आहोत. परंतु आता आपल्याला सेक्युलर सिव्हिल कोडकडे वाटचाल करावी लागेल, तरच धर्माधारित भेदभाव संपेल.