Goa News: नारळामुळे वाढली चिंता! उत्पादनात मोठी घट; चढ्या दरामुळे नागरिक त्रस्त

Climate Change Threatens Goas Coconut Farming

डिचोली: असंतुलित हवामानामुळे स्थानिक बागायतीतील नारळांच्या उत्पादनावर परिणाम झाला आहे. गेल्या काही वर्षांपासून रोग आदी प्रादुर्भावामुळे नारळ उत्पादनावर परिणाम होतो. यावर्षी मात्र उत्पादनावर मोठा परिणाम झाला आहे. यंदा नारळ उत्पादनात जवळपास ४० टक्के घट झाली आहे, अशी माहिती बागायतदारांनी दिली.

दैनंदिन आहारातील मुख्य घटक आणि धार्मिक कार्यात महत्त्व असलेला नारळ आता पुन्हा महाग झाल्याने सामान्य ग्राहकांच्या कपाळाला आट्या पडू लागल्या आहेत. चतुर्थीवेळी काहीसा स्वस्त झालेला नारळ आता पुन्हा महागला आहे. नारळाच्या दरात प्रतिनगामागे दहा ते बारा रुपये अशी वाढ झाली आहे. डिचोलीच्या बाजारात नारळांचे दर सध्या प्रतिनग ४० रुपयांपर्यंत पोहोचले आहेत.

चतुर्थीपूर्वी नारळ महाग झाले होते. मात्र, चतुर्थीवेळी नारळाच्या दरात काहीशी घसरण झाली होती. आता पुन्हा नारळांचे दर वाढल्याने आधीच महागाईमुळे त्रस्त झालेली सामान्य जनता मेटाकुटीला आली आहे. नारळ बागायतदारांपुढेही अनेक समस्या निर्माण होत आहेत. तसेच हल्ली उत्पादनातही घट झाली आहे.

‘शेकरे’ प्राण्याचा उपद्रव

तापमानात झालेली वाढ, त्यातच पावसाच्या माऱ्यामुळे नारळाच्या पिकावर परिणाम झाला आहे. त्यातच ‘शेकरे’ जातीच्या प्राण्याचा उपद्रवही वाढलेला आहे. ‘शेकरे’ जातीचा हा प्राणी माडावरील नारळ खाऊन टाकतात, अशी माहिती काही बागायतदारांनी दिली.